【now.com】已經好多年,港姐選舉冇成為輿論話題,除了每次面試時燕瘦環肥樣樣齊,好讓傳媒朋友改個花名笑一輪外,其餘過程直至去到總決賽得出三甲名字,印象都是模糊一片。近年印象最深,可能是2012年那一屆,因為電腦故障,令首屆全民投票突然變番做評判俾分選出,都可算是代表作,因而令人記得人稱民間冠軍,實得第三的朱千雪。
不過今年好唔同,今年的真正賽事,係由頒完獎出Roller先正式開始,而且戰況比作賽時更精彩,更埋身到肉。原本,由全民普選產生,讓今屆大熱十優狀元麥明詩囊括冠軍及最上鏡小姐這賽果,是最得民心,最冇異議的。不過正如反佔中人士不時強調一點︰普選不是萬靈丹。今次普選結果就真係順得民意時,失一眾嫂意。
向來強調智慧與美貌並重的港姐,一舉一動都要大方得體,每講完一句說話都要拉長兩秒講聲多~謝~,許親咩願望唔係人人開心就係世界和平,機械得毫無破綻。而向來加冕一刻,冠軍在戴上后冠繞場一周後,落選佳麗都會做戲做全套,上前送上一抱一吻,以示比賽第二友誼第一。但今屆竟然此情不再,當晚一眾落選佳麗不單沒有上前擁抱冠軍,更全數上演「等埋發叔先」玩杯葛,分別走向亞軍龐卓欣及季軍郭嘉文處祝賀,簡直完全當麥明詩透明。後來觀眾再細睇各人當時動靜時,更發現麥明詩先後向亞軍及季軍用眼神釋出善意時,卻換來大檸檬兩枚,極無癮。
Roller出完,但戰事未完,而且兩位更將戰線伸延到網上,鏡頭前的明刀都已經耍得咁精彩,網絡上的暗箭自然弄得更絕倫。兩日後,麥明詩率先在Instagram出post,以合照去感謝家人同朋友支持,自己才撐得過選美過程。好明顯佢知自己姊妹值偏低,於是加強親情技及友情度作護航。不過我同你Unfriend啫,但阻止唔到我Follow你,於是亞軍龐卓欣連隨緊貼出Post,而且得勢不饒人,繼續使出姊妹攻勢,上載與一眾落選佳麗齊齊去食雞蛋仔的自拍,繼續友情大平賣。似乎兩股勢力已經成形,並各自搵到進擊點。
根據收視報告,今屆總決賽平均收視27點,最高31點,比起上屆平均26點最高29點都高,可見幾位佳麗頗具觀眾緣。既然兩位鬥得如火如荼,作為大台無理由嘥咗個勢,一於嗱嗱聲開拍《金枝慾孽III》,原班人馬12位佳麗埋位拍選妃戲,最緊要保留番當年黎姿同佘詩曼姐姐前妹妹後的恭敬,背後勾心鬥角的情節,到時個個假戲真做,角色入晒血,真係好難唔好睇。
文:余建
〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。