【now.com】一首《羅生門》，讓麥浚龍（Juno）在事業上去到另一層次，加上30出頭便一臉白鬚的樣子，真係好似好有計咁，那種層次實在不知怎去形容。直至昨日吳日言（阿Yan）在Instagram分享的一段文字︰「他就像得道高僧，我從來只是屋村（邨）平民，跟（根）本就不適合出現在他的作品上。可能，我多心了，所以我需要流汗來冷靜。」Yeah！無錯，就係得道高僧，那股氣場就像《殭屍先生》中林正英出場一樣。
但話時話，阿Yan因乜要打呢段疑似媽咪姐手記，將當事人名字以花名代入的爆料Post。原來早前當《羅生門》推出後，不少網民戥阿Yan不值，覺得11年前在《耿耿於懷》MV的女主角，好應該順理成章在《羅生門》出現。人就係咁，好好地努力唱歌時冇人想聽冇人想睇，到淡出了，一個突如其來的機會就話好想你，仲發起召喚吳日言行動，希望她唱番首歌以及在MV出現。Yan都傻唔晒，知道一時吹捧不能當真，於是以輕鬆手法回應，將自己個樣Key落Juno同Kay的《羅生門》宣傳照Post上facebook：「咁想睇，滿足下你哋！哈哈，粗粗地，頂住先。」
以為告一段落，但原來仲有下文，據講早前公開，Juno會跟周國賢合作的另一外傳歌曲《雷克雅未克》，有意思想搵阿Yan亮相，為故事來個結尾。只是當中出了岔子，有傳負責聯絡的同事說話輕佻不尊重，以一副「搵你拍執到啦」的態度「誠邀」對方出鏡，可惜「誠意」欠了「言」，變成充滿「成見」地邀請，成功一句撻著吳日言，令她把心一橫決定推！然後事情發展就返到去在Instagram分享的一段文字。
無意中介入這段《羅生門》關係，作為「第三者」，阿Yan也沒有擺出一於要爭到底的模樣，回答記者提問時更用上「我知自己唔夠紅，知名度又唔高，不過，就算係臨時演員都係演員，應該受到尊重。」將要爭取的變成比爭出鏡層次高5、6層樓的尊嚴，實在是技術性擊倒的完美示範。至於得道高僧有何回應呢？對不起，未有回應。不過睇怕都係時候出山收拾殘局，始終事件因自己的作品而起，重新誠邀對方好，賴天口熱說話躁咗又好，再唔係適逢今日農曆七月十四，盂蘭之日，話助手鬼上身講錯嘢都仲得，總之要有個交代，免得令《羅生門》有瑕疵，道門閂唔埋就唔好啦！
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
