【now.com】也許社會關注的事情來得太密集，像鉛水事件、《羅生門》、女生墮樓、曾鈺成爆seed等，一些重要的事情往往被淹沒。女示威者被控以胸部襲警居然罪成，曾成為國際新聞，但仍然值得關注，請不要太早忘記。事件的荒謬程度就跟睇《九品芝麻官》一樣，當寫成劇本，原來有得揮。
（升堂）
陳知縣：「戚秦氏，你話常威執行朝廷職務時推到你血流披面，除了你之外，有冇人睇到？傳巡捕。」
巡捕：「大人，當日係戚秦氏衝出官道，阻礙衙差辦工，常威上前阻止，勸籲戚秦氏退後。惟戚秦氏上前用胸部襲擊常威，常威被襲倒地，戚秦氏大叫非禮。」
陳知縣：「大膽刁婦，你分明用胸部襲擊常威，竟敢話常威推你？分明冤枉好人！」
戚秦氏：「大人，冤枉呀！」
包龍星：「大人，我睇到常威推戚秦氏落地，令佢血流披面。」
陳知縣：「有邊個睇到常威推戚秦氏？」
包龍星：「我睇到，當時好多人都睇到。」
陳知縣：「好多人？人呢？摺埋啦你，傳巡捕長。」
巡捕長：「大人，我冇睇到常威推戚秦氏，當日係戚秦氏自己跌低，流少少鼻血，自己捽到一面都係。」
戚秦氏：「我冇呀，大人，我從來冇用手捽面，我對手被巡捕捉住。」
方唐鏡：「大人，我方唐鏡要代表常威，反告戚秦氏用胸部襲擊。」
戚秦氏：「冤枉呀！真係常威推我啊！」
包龍星：「大人，點可以原告變被告，被告變原告呢？」
有為：「阿叔，慳番啖氣啦，佢哋夾埋㗎，我哋企埋碌柱度做柱男啦。」
常威：「大人，小人係衙門裡面嘅衙差，當日小人執行職務時，原本只想請戚秦氏退後，點知佢突然向前跌落地，更大聲叫非禮，我根本冇掂到佢。」
戚秦氏：「你講大話！」
陳知縣：「大膽，公堂之上竟敢喧嘩！來人，掌嘴。」
常威：「戚秦氏當時亦冇即時投訴。」
陳知縣：「戚秦氏身為人妻，咁大個人第一次被非禮，受到咁大屈辱，居然冇立即報官，而係等狀師建議，先識來擊鼓鳴冤，非禮一事根本子虛烏有。實情係戚秦氏以其胸部襲擊常威，常威係衙差，罪加一等。」
包龍星：「大人，我三代為官，深知官場靠個屈字，但今次你未免屈得太過分。」
陳知縣：「輪唔到你講說話，而家人證物證俱在，鐵證如山，戚秦氏用女性身份誣衊衙差行為惡毒，唔到佢唔認罪！立即收監候判，退堂！」
即使荒謬過周星馳電影，但我們都無法改變甚麼。究竟甚麼時候包龍星才會變身八府巡案，回頭三司會審還戚秦氏一個公道？
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
