【now.com】因為參加江蘇衛視的歌唱節目《蒙面歌王》，李克勤成功在內地人氣急升，贏得歌王美譽。這名號，若發生在香港，其實近乎話俾人知李克勤是姓李的一樣無聊，係人都知啦！但當發生在大陸，這就是一張最好的通行證，往後發展將會暢通無阻。不過片段一出街，便惹來本地網民質疑，認為克勤把聲的辨識度咁高，有冇咁難認呀？加上那個白棱鏡面具未有完全遮蔽他的輪廓，頂多半首歌時間，認唔到佢係李克勤，都應該講得出係唱《紅日》嗰位啩？有造假之嫌喎。
由香港人去辨認一位香港著名歌手，當然易如反掌，只是大家又試試換個角度想，內地天王孫楠夠紅吧！若他蒙上臉換個形象唱陳奕迅的《淘汰》，相信大家也未必可即時搶答。事實上今次6位參賽歌手，其中一位羊駝面具人，內地觀眾都一直懷疑正正是孫楠，可惜因沒有勝出而無法得知其真正身份。孫楠都唔敢肯定，更何況李克勤歷年推出的國語專輯不出5張，在內地的影響力也只是廣東省限定，一下子認唔出來，不足為奇。雖則從電影《致我們終將逝去的青春》中得知《紅日》在內地唱到街知巷聞，紅到連戲中不曉廣東話的主角也可獨唱成首（當克勤贏得冠軍除去面具後，現場觀眾也立即大合唱《紅日》來向他祝賀），不過聽熟一首歌未必就等於完全解讀歌者的聲線。胡夏首《那些年》你我也聽得夠爛夠熟，但若然他突然走出來蒙面高歌《忘記你我做不到》，相信都唔係話咁易就認得出。
所以造假之聲，矛頭並非指向觀眾群，而是直線抽擊一眾評判朋友。先講巫啟賢，回想當日他擔任《星夢傳奇》評判時，已被人話佢扮奄尖裝刻薄，為鬧而鬧搞氣氛，而今次就被人懷疑扮認唔出克勤營造懸疑。巫生話就話係新加坡歌手，但多年來都在香港發展，當年曾與克勤同期，更為對方作過首《沒有你，贏了世界又如何》。咁都認唔出係李生？啲戲誇咗少少。期間仲要講句「他有李克勤的味道。」與麗梅姐金句「雞有雞味」有異曲同工之妙。而另一個被轟的是伊能静，佢就衰得較無辜，話說佢邊聽克勤演繹《富士山下》時，邊跟住唱，在鏡頭前極力演出一份投入，只不過監製一時大意，竟同時收埋音，搞到觀眾好話佢嘈住晒，阻住欣賞克勤唱歌咁話。伊能靜知道後，要連忙在微博道歉解圍。節目做咗一集，兩位評判就飽受追擊，睇嚟錄第二集時要醒醒定定，否則最需要蒙面的，不是歌手，而是面慒慒的兩位。
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
