【now.com】看這篇文章前，請用少少時間解答以下呢條問題。
問題︰請問你對上一次在城市電腦售票網成功買到紅館演唱會飛係幾時呢？
入紅館睇演唱會唔難，但能夠單憑自己努力，到城市電腦售票網買到演唱會飛先係最難。總結近年經驗，買演唱會通常經信用卡上網撳F5鍵或不停用電話Redial訂飛，乖乖繳付每張數十元的手續費。唔想煩而又花得起的，可選擇幫襯黃牛捱貴飛。不過如果你識人可以作內部認購，就算係眾多方法中最幸運一個。若你堅持想從城電買到飛的話，機會唔係冇，只有兩個︰一係早三日到門口通宵排隊，一係個Show根本滯銷，否則你只會見到一張張寫上一個個滿字的通告。
早前有議員見紅館個唱的演唱會門票炒賣嚴重，於是向民政事務局提問有關門票作公開發售的比例，發現原來根據紅館租用條款規定，主辦單位只要在每場演出用作內部銷售的門票不超出座位總數的八成，即符合租用規條。而根據有關當局提供的資料，2010年度紅館本地歌手演唱會經城市售票網公開發售的門票有51.7%，去到上年2014年，公開發售比例便只有47.3%。雖然少過一半，但原來都遠高於最低的租場條款，可見呢個規條形同虛設。過去一直留意紅館個唱在門票作公開發售的分佈情況，以下是近一年來熱賣個唱的座位表，看看便知點解紅館飛可以不停創下開賣10分鐘便售罄的紀錄。
這是最近《容祖兒李克勤演唱會》首賣的情況，基本上可以用漆黑一片來形容，而公開發售的門券應該只有3成左右，而且集中在轉角位，可能是想暗中讚你，咁都俾你買到飛，你做人真係識轉彎啫。
上年最一票難求的演唱會，一定是Sammi的跨年個唱，$680門票炒價可以高至3,000蚊一張。又看看個唱的首賣情況，基本上這張不是座位表，是一件藝術品，叫「暗黑中的黃藍紅」，分別以這三隻色去點綴一個黑夜，是個相當精緻的圖案。
貴為男神黃子華，每次開棟篤笑都定必掀起搶飛熱，不單止因為受萬人愛戴，也因為公開發售數量不多，好難唔搶。不過，作為粉絲絕對唔會怪你，因為你都係搵食啫！犯法呀？
由一眾電影《古惑仔》演員開的《友情歲月演唱會》，可能是食開江湖飯關係，搵錢都講道義，每個票價的分佈都算平均，而且公開發售比例有近4成，希望大家「不相信會絕望 不感覺到躊躇」，識英雄重英雄。
幾時都話上一輩藝人重情重義，你睇呢張座位分佈圖，就知主辦者真係好想人人都可以入場參與佢嘅榮休個唱，恭喜你呀煇哥，祝你退休生活繼續多姿多采。
重情義的，還有台灣人。今年因場地問題不能來港開個唱的五月天，每次門券都爭到頭崩額裂，但睇番張座位表，其實已經安排一半門票作公開發售，而且最貼心是刻意安排單數和雙數日子兩種座位分佈，讓粉絲不會買來買去都係得轉角位同貴飛後座。雖然其門票年年加價，但賺錢賺得你咁窩心，抵俾啦！
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
