【now.com】新一屆港姐面試，出現09年十優女狀元麥明詩前來報名，事隔幾年，她已從英國劍橋大學法律系畢業，而且變得非常省鏡。由於質素太超班，幾乎已是未選先贏，於是坊間出現一種聲音：「阿女，做乜有律師唔做，走去選港姐咁浪費呀？」
從前港姐美貌與智慧並重，是香港女仔成長的終極夢想，但如今已變成糟蹋自己的行為。的確，兩代社會不同了，從前搵錢不多，做港姐真正飛上枝頭變鳳凰，人工高，嫁得好。今天港姐冠軍都是收藝員價，萬零蚊一個月，又要充行頭，根本貼錢返工；加上幕前跟觀眾零距離，消息極之流通，未選前已查晒祖宗十八代，未見儀態萬千，先見黑材料。
而且有樣貌有身材，要出名大把途徑，可以做模特兒，夠高去行天橋，唔夠高去做嫩模。或者做blogger，生得靚，搽乜上塊面都靚，身材好，著乜衫都好睇，product捧住錢求你寫?。
仲未計學歷喎，普普通通一個大學生，係搵唔到幾多，起碼靠自己唔會買到樓。但麥明詩女拔十優，（食神tone）英國劍劍劍劍橋大學法律系畢業，斷估佢要搵百萬年薪，應該冇難度。為名、為利，選港姐都冇誘因，這位從小到大都是尖子中的尖子，為何會想參加港姐？我想到3個可能原因。
1. 佢在學業方面已完全證明了自己，但在外表上仲未，大家記憶中的麥明詩仍然是當年未識扮靚的中學生，所以她今次要一洗這個形象，贏港姐冠軍，成為一個家喻戶曉的完美女人。
2. 好多人選港姐都會自稱是來「攞個經驗啫」，或者「乜都試下啫」，其實冇乜說服力。但如果麥明詩咁諗，我又信喎，因為本來就冇必要選，花一年時間選港姐、華裔小姐，再加埋探訪和親善活動，咪同人地去working holiday一樣，玩一年再搵工囉。
3. 可能佢有好大宏願呢？攞十優時已講過撐雙普選，希望加入政府改善施政。佢6年前咁識諗，相信唔會去完英國讀law，反而變質吧？其實講得通，如果去做律師，影響力有限，亦要經過漫長時間才可以從政。但選港姐不同，選到立即全香港都識，攞住個名去選議員，簡直易如反掌。如果佢真係有咁嘅願景同勇氣，就真係抵讚！
無論任何原因，麥明詩都贏梗，一個十優出來選港姐，仲要湯唯咁款，試問仲點選其他？總之今屆亞軍實爭崩頭。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
