【now.com】清官難審家庭事，咁你當我係貪官吧，這件家事，不吐不快。
戴夢夢被影到跟太極鼓手Ricky朱翰博拍拖，十指緊扣去置地食tea。Ricky自稱已跟太太分居，本月5號已搬離屋企，但Ricky太太向傳媒爆料，二人並未分居。
因為口供有出入，箇中事實只有當事人知曉，我先不論真假，就當Ricky所講係真先。即使他太太講大話，這個人都好有問題。
首先Ricky有講到同太太協議分居，但太太未簽字。咁一日未簽字，一日都未算分居啦！就算分居，都要滿一年才算離婚。在一個分居成疑，離婚未滿的狀態下，同另一個人發展，拖泥帶水，作為一個鼓手，節奏點解會咁差？
就當Ricky情難自控，結婚27年後才終於找到真愛。但當他高調去置地歎茶，又置太太於何地呢？27年夫妻，冇愛情都有感情，冇感情都有憐憫，堂堂太極樂隊鼓手，縱橫娛樂圈30年，怎會不知道置地是狗仔隊常駐之地？去最危險地方拍拖只有一個原因，就是唔怕人知，甚至驚人唔知。就算太太肯離婚，也沒需要如此去落佢面。好來好去，聽過未？
而最出色是Ricky原本是不打算回應新戀情的，他最初說：「留番俾佢（戴夢夢）答，佢比較識答。」其實好簡單，分居，拍拖，被撞破，7個字而已，就算口吃也講得完，同樣身為男人，我覺得他簡直是極品。究竟是難答，還是難啟齒，他最清楚。
根本所有事都是從自己出發的。自己覺得分居做乜都得，自己拖新歡去邊都得，自己唔識講留番俾新歡講就得。自己、自己、自己，甚麼都是自己，彷彿其他人冇感受。可能Ricky已忍了廿幾年，忍得好辛苦，唔奇呀，好多夫妻都在我捱你，你捱我，對你捱不完。但在被綁的同時，自己也綁住另一個人，苦，永遠不是只有自己受。
結婚27年，分房瞓3星期，搬走3日，身邊已是第二條女了。問題不在你幾多日之前分居，而在你用幾多日的時間摧毀結婚時許下的承諾。承諾咁老土，講呢啲？天天有人許下承諾，同時日日有人離婚，所以不要再埋怨世界變得快，因為人變得仲快。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
