【now.com】今年3月，最期待的畫面終於出現，膠劇《愛‧回家》終於宣布會大約在800集左右大結局，其中一位編劇更在微博上載一張「804集全劇完」的相片，令人開心到跳起Yeah！雖則接力開拍的是阿旦（鄭丹瑞）炒冷飯之作《高朋滿座2》，但總叫換過班人，尚存一絲新希望。直至前日，大台正式公告天下，緊接《愛‧回家》播出的，將會係《愛‧回家2》。嘩！驚喜真係話嚟就嚟，嚇到個心離一離。實行換換人腳，就當係華麗轉身。當時的心情有如等了5年終於等到梁特首要落台，點知佢臨走一刻又宣布將會連任一樣！塵世間最慘的事，莫過於是慘X2。
網民對此大表不滿，有說膠劇死唔斷氣，令人有家歸不得，又說換湯不換藥，已經家不成家，怨聲載道。或許事件令人憤慨，但你鬧人之前，問問自己，究竟你有冇睇過《愛‧回家》？它的賣點是甚麼你知唔知？總括來說，它的賣點不是演員不是劇情更加不是主題曲，而是兩字︰「堅持」。全套劇能夠撐到800幾集，力量源自編劇堅持為每集設計一個誤會，然後又在同一集內將誤會解開。劇中的誤會大致分成幾種，包括以為你愛同事A，原來係愛我。見阿爸靜靜雞食藥以為生Cancer，原來係生痔瘡。廁所偷聽到老闆話公司將會執……惶恐，原來聽漏咗另一半，係執到批平貨。所以劇集由2012年3月開始，就為大家拆解了800個誤會，如果世上真的有神，好想問神一句︰「到底世上仲有咩誤會係《愛‧回家》未拍過？」
當你知道《愛‧回家》原來有這份獨特個性後，你仲有冇疑問呢？
問︰「有呀！明明話叫咗阿旦開拍《高朋滿座2》，?家當冇咗件事呀？」
答︰「冇錯呀，係會拍《高朋滿座2》，不過你聽得唔清楚喇，唔係阿旦，係阿丹，丹爺個丹（劉丹），咁所以《愛‧回家2》的確係會冇咗馬氏一家囉。至於《高朋滿座2》幾時開拍？等《愛‧回家2》完咗先講啦！」
問︰「喂！咁張『804 全劇完』字樣相呢，咁仲唔係完呀？」
答︰「嗱嗱嗱！有冇留意張相影到個『完』字後就冇咗，其實玄機就喺後面，因為仲有兩粒字同一個標點符號影唔到，就係『得未？』原來呢個只係編劇問監製的問題︰『全劇完得未？』咁好明顯當時個答案係未啦！」
《愛‧回家》對誤會的堅持，可以連成套劇的前途都搞出一個誤會出來，真係就算有機會問到神，神都估你唔到啦。所以《愛‧回家》大可媲美《大時代》及《天與地》，歸類為神劇。唔好又誤會，唔係神級劇，係神經劇。
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
