【now.com】睇完nowTV的藍潔瑛專訪,感受甚深,尤其她形容傳媒這一句:「娛樂記者嘩眾取寵,非常之冇傳媒良心,非常之冇公眾良心,非常之冇公德心、非常之冇道德」鏗鏘有力,作為娛樂媒體工作者,雖然自己沒寫過違背良心的報導,但仍然為行業現狀,感到非常之羞愧。
藍潔瑛鬧得冇錯,在這個訪問之前,有周刊在《大時代》重播之初,就大字標題寫過,指她煙不離手、頭髮花白、凸腩巨躉。而傳媒多年來亦將藍潔瑛塑造成一個精神失常,經常恍恍惚惚流連街頭的瘋婦。
將心比心,報導說煙不離手,事實上香港煙民甚多,煙民誰不是煙不離手?藍潔瑛51歲人,有白頭髮有幾奇?不做幕前,中年發福何罪之有?
而在nowTV的訪問,我們卻見到一個精神奕奕的藍潔瑛,跟報導落差甚大。原因很簡單,那些所謂報導,大都在幾百米外偷影,根本未跟藍潔瑛作任何求證,回去挑幾張影得最肉酸的,再看圖作文。其實,有心想知藍潔瑛近況,或想拍她的照片,大可以堂堂正正上前邀請她做個訪問,你能給她充裕時間化個靚妝,染個靚髮,穿件靚衫,像今次般給她基本尊重,她會應承呀!看看訪問片段吧,她思路清晰,回話敏捷,有碗話碗有碟話碟,是你自己心虛,怕她答得不夠juicy罷。
做新聞就算需要juicy,也不能偏離真實這條底線。藍潔瑛冇錢跟你打官司,也不代表可以隨便欺負。而最冇良心,是欺負完之後,再寫幾句藍潔瑛有幾可憐,記者有幾心痛,偽善至此,你說多噁心!
可憐了同行其他有良心的記者和媒體,被這些冇道德的傳媒拖累,形象一落千丈。即是警察一樣,上面坐個唔講道理的老闆,養出一班砌生豬肉的警察,於是出到去所有警察都變成亂作口供的大話警察,班好警察為兩餐一樣要硬食,但背脊骨落囉。有辦你睇,記者們請千萬要自省,憑良心做事,否則有日通通變成黑記,就恨錯難返。
文:魯連
〈娛樂乜乜乜〉
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。逢星期一至五刊登。