【now.com】香港最追捧，同時又最怕見到的電視劇有二。一是《創世紀》，每逢網上見到許文彪金句「呢個世界公平咩？」出現，就知道樓價又升到入唔到市的水平。二是《大時代》，1991年的劇集，到今天每有股市大升，魚翅漱口的股民最怕就是見到丁蟹，真正聽到秋官個名都心驚肉跳。
跟金錢有關的話，香港人特別敏感，反應特別快。其實就算《大時代》不重播，香港早就存在一班道義放兩旁，利字排中間，口口聲聲對你好，但又處處壓迫你剝削你的丁蟹。好在香港還有一班方展博，忍受著親人被逐個逼死的痛苦，一直咬緊牙關，等待大奇蹟日的到來。
劇中首先被殺的是方進新，被丁蟹一槌打壞腦，之後被打死。現實中真普選就被丁蟹們一槌⋯⋯定音打傻，再在8月31日被打死，如此丁蟹的宿敵，就不存在了。而最劇力萬鈞的，是丁蟹殺完人，還向全世界講：「我冇做錯到！」
細妹方敏，慘被丁益蟹強姦，她是方展博最細的妹，是一家人的底線，死了，就如同我們被壓迫而死的生活一樣。
方婷、方芳，我們的價值觀和包容，之後亦相繼被殺。死得很冤枉，只因我們的價值觀跟丁蟹不同，我們包容的定義跟丁蟹不同，就成為犧牲品。在丁蟹面前，道理都成了歪理，歪理都成了道理。
玲姐早知道丁蟹的恐怖，本已離丁蟹有咁遠得咁遠，但仍難逃痴纏，被逼到瘋癲再殺死，如同我們的法治，是一場悲劇。
在方展博旁邊，也算有個慳妹一起共同進退。但現實中的慳妹真的太慳住慳住，手握關鍵少數的議員，白鴿眼發作，只在有利益的時候出手，一味叫人循序漸進袋住先，唔多可靠。
還有炒股必勝法呢！這可能是收復失地的絕招，可惜方展博連最基本的必勝法亦未參透到，裡面隻隻字都識，但加埋一齊完全唔明，想搵大人解釋，但又知道大人是老狐狸，非必要時不想行到這一步。
丁蟹恐怖，更恐怖是香港還有更多人為利益前仆後繼去做丁蟹的親生仔，就如戲中丁蟹的四個仔一樣，黑社會、律師、專業人士都有。成為蟹仔後，就學足老竇，自以為正確，靠各種暴力「替天行道」，殊不知大結局，卻率先被最崇拜的老竇逐個推落樓慘死。
當然，現實中方展博未必會贏，就算贏，也必然會是冚家富貴式的慘勝。
我其實更想看《大時代》前傳，因為想知道究竟方展博一家，前世做錯什麼，今世得此報應。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
