【now.com】要成為一個成功的節目主持人，首要有自己的風格，你可以有蘇絲黃的霸氣，也可以有黃翠如的傻氣。形象未夠鮮明，可以用說話搭夠，一句「雞有雞味」跑出了黃麗梅，而黃興桂就以精準分析射十二碼的兩大可能性︰「一係入，一係唔入」而一句成名。這兩道板斧實在是有意當主持人的朋友必學，如果你兩樣都冇，別太灰心，世事總有彎轉，就算冇，拚命地原地轉圈死用一式來招架也可以出人頭地。
TVB的魔術節目《至尊街頭魔法王》，以香港著名魔術師甄澤權Louis為主角，走到街頭表演多種魔術，並由阿Bob林盛斌及吳若希做主持。作為一個魔術節目，最搶鏡的理應是魔術師，不過世事正正就有彎轉。吳若希在節目中，主要負責俾反應，即是當魔術完成一刻，要亢奮地叫！嗌！喊！以這準則計，吳若希做得相當稱職。或許她只是靚女一名，沒有鮮明性格，對答正路亦沒有醒神金句，但她有的是無限Loop能力，只要袋穩三句對白，就足以應付一整集的需要，係咪好想學呢？去片！
第一句︰「亞～啞～呀～」
當魔術由進行中到完成的幾秒間，你需要營造出一種起初疑惑，到最後變成驚訝的氣氛去吸引觀眾，有人會用上好幾句說話去填滿，但吳若希單單一個「呀」字，再配上廣東話九聲的奇妙，便將那種驚為天人的「開心大發現」演繹得淋漓盡致，令大家有如置身現場。
第二句︰「好勁呀！」
「呀」完一輪，總要來個評語吧！這句「好勁呀！」好使好用。即使你無法從這句評論中領悟到這個魔術到底厲害在哪？但只要聽到「好勁呀！」就知非同小可，不解釋。
第三句︰「點解嘅？」
它的出場頻率極高，其中在金魚街表演一集，便創下連環發炮三次的紀錄，害得Louis也難以招架。而且「點解嘅？」亦是三句對白中，最具殺傷力的一句！因為它隱藏住一份內心掙扎和自毀的傾向。眾所周知，除非這個節目叫《踢爆魔法王》，否則魔術師無可能在表演後自拆招牌地將竅門公諸同好，但吳若希就正正能捉緊觀眾心理，代全港觀眾不停問「點解嘅？點解嘅？點解嘅？」明知對方不會答，卻堅持問下去，還要一式一句到尾「點解嘅？」那種煩擾程度逼令觀眾們也不想再知了，成功催毀了觀眾的求知慾，順手為Louis落閘，應記一功。
不過更應記下一功是一班節目的幕後功臣，所指的不是為Louis準備魔法道具的手足，而是為吳若希配上字幕的字幕組同事。細心留意下，一句「點解嘅？」可演變成「為甚麼」、「怎麼會這樣」、「為甚麼會這樣」、「為甚麼會那樣」，相信是負責同事也想在重複的工作中找點新意吧，於是在不知不覺間，為電視機旁的小朋友上了一節很好的中文課。各位同學，今晚《至尊街頭魔法王》最後一集，記得準時10點半上堂喇！
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
