【Viu】70歲米雪今晚完成入行55周年首個演唱會嘅頭場，完騷接受訪問時佢鬆一口氣，亦期待聽晚尾場同嘉賓要玩盡啲！講到雪姐著魚網透視Look跳唱《APT.》掀高潮，佢大方話只要靚而高雅就唔介意性感，更邀請經常同佢一齊登台嘅石修孖住魚網Look。
至於台上懷緬已故男友尹志強，雪姐話係導演意思，佢指男友一直喺上面睇住佢。講到已故資深演員廖啟智太太陳敏兒今日病逝，雪姐表示以前會跟智叔夫婦同發哥一齊跑步，幾個月前亦有跟敏兒見面，但唔知道對方有事。雪姐又慨嘆鍾景輝的離世：「人生必經，只有惋惜！」亦會記住King Sir就算地位幾高都愛錫後輩，值得學習。
同智叔夫婦相熟嘅黃日華，受訪時亦顯得哀傷，佢透露早知敏兒身體有事，知道佢半個月前更曾陷昏迷。石修亦表示同敏兒入行初期合作過兩次，幾個月前雙方曾見面，有傾偈但唔知對方身體狀況，願故友安息！
