【viu】余迪偉同JJ詹朗林喺今年書展各自出新書，雖然一個走風趣幽默路線、一個認真談生死，但人生哲理不謀而合，所以一齊開講座。
迪偉同JJ夾晒着白恤衫，迪偉取笑JJ怕「飛釘」所以打底，搞到JJ「阿尷」上身話：「可唔可以唔好講得咁白」，超搞笑！
講到出書，迪偉絕對係大師兄，已經推出超過20本書，而近年再度執筆原來跟Do姐鄭裕玲有關，佢仲透露今次好「赤裸」，因為全部相片都喺佢屋企拍攝，連最私密嘅「浴缸照」都出動埋。
而被迪偉笑指「靠靚仔」上位成新晉作家嘅JJ，去年因為簽書會人數太多，一度遭書展投訴。JJ自爆今年原本唔打算出書，好謙話自己墨水唔多，寫得好辛苦；迪偉一臉認真讚JJ寫得好，所以幫佢撘橋再出第二本，笑言當本新書係自己個孫。單親家庭長大嘅JJ透露書中有講同爸爸嘅關係，由帶恨意變釋懷，想聽兩位才子更多分享，就要睇足本訪問。
