【viu】第二屆《The NextWave 沙灘音樂節》今日Day 1！兩隊《造星》代表P1X3L、ROVER喺頭part出場，同樣都係首次參與沙灘騷，心情超high！
P1X3L臨出場前突然落傾盆大雨，但三子話無有怕，因為預咗全身濕透，就睇吓係汗水定雨水啫！問到George會唔會趁今日兌現騷肌承諾？佢抵死再推，仲話有拖冇欠，搞到兩位兄弟Marco、Phoebus即刻跟隊，連騷肌都咁齊心！
三子早前再孖5G拍綜藝，呢轉飛去泰國「沙華Dee卡」！佢哋笑話最難忘嘅係每日都好攰，日拍4個items，所以呢次冇時間畀Sica飲醉！今次Phoebus玩遊戲又有冇好勝心爆發？George好似有透過story出貓？
師弟ROVER連續三日出騷，亨仔笑話日日都好大壓力，沙灘騷唔係開心玩㗎咩？典解呀？Kim話佢哋唱唱吓落大雨，氣氛方面加晒分，唯一受影響嘅只係視線，另外三位Bro即爆佢興奮到出去淋雨，Kim反擊最錫身嘅係亨仔，第一時間匿埋咁話！
見雨勢越落越大，希晉支咪亦壞埋，但佢一啲都冇慌，執生啟動「內置大聲公」！前日勁威晒震波功嘅佢，今日又着得勁密實，主要原因係怕被亨仔比下去？Jason Loi自認最唔鍾意同陽光玩遊戲，又揭有「天氣之子」封號，唔通啱啱落雨係因為佢？佢仲講笑指如果ROVER開戶外騷，寶姐話要換鼓手？ROVER缺一不可㗎！
