【Viu】香港電台舉辧「第45屆十大中文金曲」頒獎典禮今晚喺九展圓滿結束，MC張天賦橫掃五獎成大贏家，與Gin Lee分別奪得「最優秀流行歌手男/女大獎」，MC以《世一》歌詞形容當刻心情，話多咗份責任感。今年表演嘉賓有超火辣嘅DJ Soda，問MC使唔使目不斜視？佢好坦白話：「咁性感有留意。」仲好自信對方可能搵自己集郵添。
好兄弟洪嘉豪則憑《只要你不尷尬》得十大中文金曲，直言已經好耐冇攞獎，能夠喺九展拆卸前再上台，佢話勾起好多回憶。嘉豪透露嚟緊會將紅館演唱會搬到澳門舞台，問到使唔使keep住小蠻腰，佢話為瘦身搞到個人太虛弱，連院友都戥佢心痛，但就唔使換過批衫，只要着返件打底衫已Ok,係有計嘅。對於好友AK嘅緋聞，嘉豪就避而不談。
多棲發展嘅Sica拎咗「最有前途新人」金獎，佢話自己最有前途應該係個銀包，豬籠入水喎。九展同樣令Sica勾起好多回憶，早前佢就以「明日香」造型參與最後一屆RG，真係好應景。雖然係搞笑，但由十年前喺九展玩Cosplay到依家，見返好多朋友仔，Sica都話忍唔住眼濕濕。佢仲透露日前被蚊咬搞到隻眼得返一條線嘅「遇襲」經過。
另外，剛與破產男友分手嘅JW，否認係拜金女，最重要家人同朋友明白，日前同大家慶祝34歲生日，唔心急拍拖，但因為好鍾意小朋友，所以早前已雪卵做準備。而Dear Jane嚟緊組隊20周年，將有連串嘅企劃，咁豐富訪問內容，記得要睇足本訪問。
