【Viu】COLLAR成員Marf邱彥筒，噚日推出今年首支個人單曲《TXT or CALL》，內容講述一對處於曖昧狀態嘅男女，男嘅對女嘅態度忽冷忽熱，啲訊息時覆時唔覆，搞到個女仔「囉囉攣」。為咗迎合首歌主題，Marf親自邀請好友Jeffrey魏浚笙擔任MV男主角，佢話之前同Jeffrey為品牌一齊影相，見到出嚟效果好有趣，「同Jeffrey同框擺埋一齊，有啲唔夾、又有啲夾嘅感覺；加上佢天生麗質，為我首歌嘅主題有好貼切嘅代入感，可以做好典型嘅『bad boy』，其實本身想搵佢做啲斯文男仔，但佢話造型上想有啲改變。」
MV中，Marf除咗以多個造型示人外，亦「瞓身」吊威也倒吊上陣，佢話同導演講唔怕辛苦，倒吊反轉點都得，最鍾意吊威也，感覺好正，想吊多幾次喎。而Jeffrey今次一反陽光男孩形象，演繹對另一半忽冷忽熱嘅「bad boy」，佢戴上唇環造型透出野性味，大讚角色好玩。仲話MV中嘅角色完美演繹「欲拒還迎」：「呢招男仔用係屈機，通常女仔都會囉囉攣。」Jeffrey問到Marf如果同對象曖昧中，想對方TXT定CALL佢，Marf即刻揀Call，皆因聽到聲先最真實咁話！
