【Viu】馬詩慧（Janet）今日同兩個女王曼喜（Kayla）、王麗嘉（Irisa）喺中環，出席香港首個以紅斑狼瘡症患者為專題嘅攝影展。聽日係Janet同老公王敏德結婚30周年紀念日，加上仲係母親節，雖然Janet話唔會太肆慶祝，不過Kayla透露會與夫婚妻Elaine為媽咪下廚：「其實主要係Elaine煮，我煮嘢唔叻，但係會幫手切下嘢、洗下嘢，之後會有個surprise，但係媽咪喺度唔講得住。」問到佢哋有冇咩說話同媽咪講，Kayla多謝媽咪一直以來嘅照顧，Irisa鬼馬地話：「新年快樂！」
至於，Kayla嚟緊9月會喺美國，同攝影師Elaine完婚，問Janet有咩相處嘅心得傳授畀佢？佢話：「兩個人生活係好大學問，雖然話30年，但我仍然學習緊，點溝通、點包容對方，又係咪每日都做到呢？未必，但係會繼續學習。」Kayla婚後將喺美國定居，佢話唔會擔心離開屋企：「但一定會有唔捨得，但係遲啲正常啲嘅時候，大家可以飛嚟飛去，就OK。」佢透露婚禮亦都籌備得七七八八，早前亦影咗婚照：「不過我哋都好chill，唔係要好華麗，最緊要係大家終於聚埋一齊，開心下。」將會為家姐擔任伴娘嘅Irisa笑謂：「其實成世人未去過婚禮，所以我唔係好知點樣，所以唔係好知自己要做咩。」
