嘉緯艾力士建奇功 傑志2：5負曼聯有交代

【now.com體育】雖然遭曼聯大炒，但傑志憑林嘉緯及艾力士兩個精彩入球，最終以2:5不敵紅魔，表現絕對令現場球迷收貨。

經過康文署的搶修加上天氣轉晴，大球場質素總算比前兩日理想，而雙方亦未有受明顯影響。17分鐘，韋碧克禁區「執死雞」撞射得手，曼聯領先1:0。22分鐘，史摩寧接應卡華利傳中頂入，曼聯擴大領先優勢。27分鐘，法比奧細禁區篤射破網，曼聯半場領先3:0。

下半場50分鐘，贊奴沙接應畢特拿左面傳中頭槌破網，曼聯領先至4:0。3分鐘後，林嘉緯禁區頂射入世界波，為傑志破蛋。68分鐘，艾力士禁區內扣過卡華利射遠柱得手，傑志追成2:4。80分鐘，連加特25碼抽射破網，為曼聯「埋齋」之餘，亦將戰果鎖定為5:2。

傑志入球功臣林嘉緯相信一世難忘這個金球：「能夠兩對曼聯已經非常難得，能射入一球實在太過榮幸。今場波曼聯踢得非常認真，輸波實在無話可說。但我們能夠取得兩個入球，表現絕對收貨。」

曼聯領隊莫耶斯指並無擔心場地質素，亦非常滿意陣中年輕球員表現。莫帥信心十足地表示，已經做好開季的準備。