意大利球員頹喪不已。
(©AFP)
【Now Sports】編輯朋友一完場就笑我係上屆【熱血球迷】最遲收筆嗰個，今屆係最早離場，冇得呃稿費嗰個。勉強冇幸福，意大利今屆係踢得差，夾硬上沒有好結果，意料中事。
撰文：Malena（燕飛）
由第一場開波冇幾耐就掟個界外球俾人入波，到今場俾瑞士K.O.，就算係支持者都要承認，今屆意大利冇幾多分鐘踢得好。分組賽差啲出局，面對上屆手下敗將瑞士完全唔夠踢，技不如人，一路睇，一路唔敢唔想睇落去，支持愛隊變懲罰。陪我睇波嘅朋友問我：「上屆點贏冠軍㗎？」我冇出聲，心諗：3年啦，成個世界都變晒啦。
除咗當拿隆馬、巴利拿同埋新晉嘅卡拉費奧利，其他全部都抵鬧，尤其係教練史巴利堤，人腳換幾次，執極都執唔好，逐個球員秤都冇理由俾瑞士咁樣㩒住揪。唯一安慰係打起個卡拉費奧利，其實意大利本來仲有個小白臉史卡雲尼，只係傷咗踢唔到決賽周，意大利幾差，始終代代都出到好後衛。
出局都應該要大方祝福西班牙同瑞士入決賽，由贏過我哋嘅對手攞冠軍，個心都舒服啲。上次提到好怕見意大利球員著嗰件白色波衫，覺得男人著總係娘娘腔，寫完俾人鬧。其實我係話唔啱男人著，件衫啱女人著。跌價啦，我會買番件留念。下屆大賽有緣再見，Ciao！
撰文： Malena（燕飛）
現在我老了，人家才說「你很好」。