10年前，莫天才最終冇得留低。
(©AFP)
【Now Sports】曼聯遭逢今季聯賽第13場敗仗，係隊波英超單季新高，睇番之前兩次輸12場嘅賽季，時任主帥都冇留任，照敢推算，坦夏前景堪憂啦啩？
撰文 ：球十三
經過周一大敗，唔少名宿對坦夏留任持悲觀睇法，例如舒利亞、加歷查都深信坦夏烏紗難保，加利尼維利就認為贏英足盃可救坦夏一命。係嘅，曼聯防線天殘地缺係事實，但呢個成績點都講唔過去，坦夏馬首是瞻，隻大鑊卸不了。
對上兩次曼聯單季輸12場，係2013/14、2021/22年，嗰兩季之後最終都換帥。2013/14係「後費格遜年代」嘅首季，莫耶斯既被戲謔為「莫天才」，又曾俾球迷施「空襲」，空中展示叫佢下台嘅橫額（圖），諷刺係4月不敵佢成名球會愛華頓，輸到第11場後就被炒魷，由名宿傑斯出任看守領隊，之後喺威爾斯人麾下多輸1場，全季埋單輸12場，由雲高爾上台。
2021/22年，又係曼聯多事嘅一季，季初先有蘇斯克查下台，卡域克短暫領軍後由漢歷克掌帥，結果全季埋單輸12場，佢同會方協議下改變本來以顧問身份留任嘅計劃。轉任奧地利國家隊可以話為漢歷克提供最好嘅下台階。
至於對上一次曼聯比今季輸得更多，係1989/90年英甲（當時最高級別，輸16場），嗰季費格遜有賴季尾贏英格蘭足總盃力保烏紗。此一時彼一時，坦夏會唔會得到同等厚待同機遇？贏到曼城捧盃至講。
13不祥，十三就覺得坦夏難留任，近日有傳拜仁慕尼黑睇中坦夏，敢問市場係咪真係良帥凋零到咁嘅地步？
真係咁易搵「仁」笨？
撰文：球十三
足球迷叫第十二人，冇偏愛，冷眼旁觀係十三。