【Now Sports】睇完美斯喺東京嘅練波片，步頭爽朗，種種跡象顯示，佢好有可能喺今日對神戶勝利船落場，香港球迷少不免承受「二次傷害」。碧咸呢？身處卡塔爾睇波。
撰文：球十三
啱啱睇韓國喺亞洲盃4強出局之餘，發現碧咸（David Beckham）亦係座上客。即時感覺係，萬人迷呢幾日辛苦喇，幫美斯（Lionel Messi）頂咗咁多，行開下係好事，至於係咪同美斯鬥氣？當事人至知。總之從好幾張外國通訊社圖片睇，但見碧咸心事重重，擺明仲諗緊點拆今次美斯喺香港嘅No Show風波。
美斯拍拍屁股離開香港，碧咸就恕難瀟灑走一會。
唔係想為碧咸開脫，今次事件，作為國際邁阿密班主嘅佢責無旁貸，肯定有啲嘢可以做得好啲；不過有啲事，係駕馭唔到就駕馭唔到。深信碧咸喺事前、國密對港聯期間、事後所做嘅嘢，斷斷唔止含笑任噓唔嬲、賽後繞場揮手、遇球迷衝入場叫開保安有求必應，補鑊示好咁簡單。
再講，香港人對碧咸始終有份感情，回歸前已經追捧佢，而佢多年嚟訪港無數，冇錯商業性質居多，但相信點都對香港有份感情，最起碼，唔想令香港球迷難受。
相信碧咸比賽前，以至比賽期間知勢色唔對，至少都有向教練馬天奴甚至美斯示意一下，但英國人紳士嘛，出場嘅嘢最後都留畀教練，而只要美斯耍手擰頭係都話唔舒服，天王老子都郁佢唔到。
突然諗起幾個月前，當美斯帶領國密贏中北美聯賽盃，碧咸攬實美斯張相，十三當時有擺上自己fb，圖說係設計對白「今鋪我發啦！」。係嘅，幾個月過去，美斯令國密舉世知名、帶來龐大商業收益、季票售罄，亞洲之行明明想省靚招牌，點知今鋪咁大件事成為國際新聞，唯有老套講句「成也美斯、敗也美斯」。
碧咸心緒不寧，梗係啦，除咗No Show風波，另一個大彈就係處理同美斯嘅關係。兩個彈都咁大，係難拆。佢球員時代百步穿楊、七旋斬勁爆，又擅長憑完美臭皮囊、親和力宣傳，但係細緻嘅嘢，或者都係要靠領導班底其他人幫手出謀獻策。
如果有睇舊年套《碧咸傳》，就知佢當年無論入波贏波、出事（世盃攞紅牌），第一時間就想依偎個老婆，心靈慰藉勝過一切。當香港球迷滿腔怒火，碧咸不知所措，此時此刻，佢大概最需要辣妹。
撰文：球十三
足球迷叫第十二人，冇偏愛，冷眼旁觀係十三。