福仔不必太愁，你今季已經很出色。
(©AFP)
【Now Sports】「咪一X樣」喺呢幾年未免用得太濫，至少唔能夠應用喺今季嘅曼聯身上、暫時收起，紅魔今季，冇枉過。
撰文：球十三
曼聯經歷一個非常動盪嘅球季。坦夏接過燙手山芋，開季兩連敗30年嚟首度排榜尾，世界盃前發生基斯坦奴朗拿度離隊風波，驚變過後，隊波顯然有番新氣（都仲要戥前帥蘇斯克查唔抵），華舒福大勇帶動球隊，聯賽次循環贏過曼城；及至3月慘吞死敵利物浦7蛋，換轉以前會一蹶不振，起碼沉幾場，點知4日後就大炒貝迪斯四個一皮回魂，極速反彈唔簡單。
整體嚟講，呢頭紅魔除咗輸俾利物浦場波，都冇乜大甩轆，坦夏確係為球隊帶嚟穩定。英超重返前4、英聯盃封王、歐霸盃入8強，到啱啱呢場決賽輸俾兵鋒正盛嘅曼城，輸俾根度簡兩球窩利，都係非戰之罪。
簡單講，曼聯每一項賽事都比去季進步，咁下季又點？
當年同曼聯擦身而過嘅舒利亞，話曼聯需要添兵，其中一項當然係買中鋒，如果買到哈利簡尼自然好喎......係嘅，除咗福仔同般奴費蘭迪斯，成隊再冇其他球員入波達雙位數，不過之前冇影嘅山曹有番少少起色，安東尼、加拿曹都潛力未盡，十三反而覺得繼續執好防線至係王道，家陣只要傷一兩件，整條防守即時不穩，咁係兼顧唔到歐聯嘅。
曼聯近兩季戰績比較
球季 英超 英足盃 英聯盃 歐洲賽
2022/23 第3 亞軍 冠軍 歐霸盃8強
2021/22 第6 第4圈 第3圈 歐霸16強
撰文：球十三
足球迷叫第十二人，冇偏愛，冷眼旁觀係十三。