【Now Sports】自小老豆教落，就算輸都唔緊要，但要輸得漂亮。上星期日F1摩納哥站在雨戰情況下，大會以安全理由，起步改為安全車帶領的Rolling Start，主場出戰嘅陸克萊（下稱陸仔）排頭位出賽，撇除一起步被超車的可能後，滿以為天時地利人和「實食冇黐牙」，但事實往往事與願違，命運再次安排陸仔衰喺自己車隊手中。
如果有睇直播嘅車迷朋友應該記得，當時賽事中段地面開始轉乾，法拉利車隊罕有地使用Double Stack Pit Stop策略，一次過安排兩名車手在同一圈進入維修站，在短時間內先後換胎。無錯，當一切掌握得好絕對係可以Win Win雙贏，可惜嘅係車隊今場策略錯上加錯。
先前已換一次半雨胎嘅陸仔，突然被通知要再換一次乾地胎，變相將頭位拱手相讓；與此同時車隊才急忙發現，當時陸仔位置與前面隊友辛斯兩車距離的時間，不足以讓辛斯先完成一次換胎，換句話說，即係要後車陸仔「等等先唔該」！頭搖又尾擺嘅陸仔入站後仲見到辛斯燈尾，白白拖慢多幾秒等埋位，之後被紅牛超車的事就不用多說，渴望到手的分站冠軍就係咁樣被「法拉利」沖走了。
在沒有出安全車的正常情況來說，F1現今主要有3種Pit Stop戰術。
Undercut——後方車輛比前方車輛更早入維修站換胎，然後利用新輪胎優勢縮短與前車距離，繼而在前方車輛進站時，後方車輛得以利用賺到的時間來過頭。
Overcut——簡單來說是Undercut的相反，後方車輛利用前方車輛進維修站時，加快圈速拉開距離，繼而在自己進站後，重回賽道時過頭，不過成功例子較少，要視乎路面狀況及輪胎損耗等。
Double Stack——車隊兩個車手在同一圈進維修站，在首名車手換胎後，第2個車手緊貼補上換胎，但涉及精密的時間計算，比Overcut更為少用。
其實提前換胎，去到賽事尾段會有爆胎風險，如果得不償失隨時要再換一次，與其話今場係紅牛有運，不如話法拉利自己飲恨。
撰文：MJ，一個喜歡用蔗渣價錢落街買燒鵝…味薯片的小編
