【Now Sports】香港劍擊隊最近馬不停蹄出席多個商業活動,奧運金牌張家朗偕大師兄張小倫再齊齊出動,出席代言人簽約儀式,為銀行及保險品牌擔任代言人。
兩名花劍運動員穿上劍擊服裝出席活動,一出場就受到在場市民熱烈歡迎,家朗及小倫在台上除了簽約儀式外,更即場教授及示範多個劍擊劍法及步法,又向現場觀眾拋出簽名手套。活動完結後,不少市民仍留下等待2人,希望與他們合照及索取簽名,有小朋友更大叫「張家朗我好鍾意你呀!」,十分受歡迎。
對於被委任為銀行及保險品牌代言人,小倫說,「都幾驚喜,我哋兩個一直有跟藍十字合作,東奧之後銀行就搵我哋合作做代言,對運動員係一個鼓勵,多啲商業贊助去推動運動發展,對於我來講係好開始。」
小倫在活動上提到計劃第二人生,被問到退休計劃時,他表明希望出戰3年後的巴黎奧運,之後才慢慢退下來,「我嘅目標係3年後嘅巴黎奧運,希望可以陪伴到佢哋一路去完成呢個目標。」
小倫表示目前劍擊隊十分努力練習備戰亞運,「我哋依家好畀心機訓練,就係為咗下年嘅亞運會,如果有得去亞運會,我哋嘅目標係金牌,因為我哋銀牌銅牌都攞過,我哋最終目標肯定係攞金牌。」