【Now Sports】18年前佢喺英超地標備受矚目，18年後地標2.0一樣成為球壇熱話，換轉係第二個，我會話：「又係佢，曼聯苦無良將？」但講嘅係基斯坦奴朗拿度，咁就唔同。感覺曼聯甚至英超嘅世界天色晴朗，係向好嘅，好shine。
撰文：球十三
十三仲好記得，2003年萬人迷碧咸離開曼聯，換嚟係名不經傳嘅基斯坦奴朗拿度（Cristiano Ronaldo）。取代碧咸7號喎，曼聯押注喺一個乳臭未乾嘅葡萄牙小子身上，得唔得㗎？當日睇佢踢地標戰，一齊睇波嘅女球迷講：「幾靚仔喎！」珠玉在前，比起碧咸，我又唔覺係喎。印象最深刻係佢明顯想表現自己，但推波唔係好順，印象麻麻。又記得，當年工作嘅報館為咗將佢同大哨朗拿度以資識別，譯佢做「基斯坦奴」。
又記得佢地標賽後，英國傳媒寫佢去名店掃貨，拎住某個時裝大品牌個購物袋，有啲鄉下仔出城feel，我心諗：「花瓶嚟㗎啫！」
18年貶眼就過，當時係沙士疫情漸減，家陣新冠喺本港亦疫情退卻，18年間世界發生太多事，而當年呢個「碧咸接班人」就建立鑲滿光輝嘅足球事業，CR7名動天下。除咗世界盃，佢要贏嘅，基本上都贏過，甚至乎青出於藍，呢代人講曼聯7號，大家第一個諗起嘅唔會係白賴仁笠臣、簡東拿或者碧咸。
咁佢回歸，曼聯係咪萬里無雲，從此順風順水重建王朝？未敢講，但指向一定會係正面。近年曼聯就係缺少能夠感召全隊嘅icon，C朗對自己要求高，三十幾歲仲踢到當打咁，試問隊友邊敢唔積極發奮？冇針對人，類似普巴時而俾人散漫嘅感覺，應該唔會再出現。
佢回歸對整個英超亦頓時熱鬧起嚟，呢個最受歡迎嘅聯賽從此又話題無盡。聽蘇斯克查講，C朗今日對紐卡素一定落場，唔正選都起碼後備；當真係唔踢，都肯定會喺奧脫福亮相，今日sport.now.com就準備好多段【C朗登場2.0】，一齊迎接萬人迷回歸。
【英超】曼聯VS紐卡素
Now TV 621台11/09 22:00直播
Now E 同步直播
撰文：球十三
足球迷叫第十二人，冇偏愛，冷眼旁觀係十三。
email：ballthirteen@hotmail.com
歡迎瀏覽球十三fb專頁，若得到波友一個like，就是我們團隊的一大鼓舞：
www.facebook.com/ballthirteen