車仔互射12碼6：5發「維」捧歐超盃

【Now Sports】周三歐超盃，車路士與維拉利爾激戰120分鐘踢成1:1，車仔在互射12碼以6:5捧走新季首個獎盃。

在貝爾法斯特的溫莎公園球場，車路士由哈伐斯、添姆雲拿、施耶殊組成鋒線，中堅查化查路巴從外借回歸作出處子戰。維拉利爾前鋒迪亞地標上陣，與謝拉特摩蘭奴、耶利米賓奴合作進攻。

上半場，車路士一直佔盡優勢。戰至27分鐘，馬高斯阿朗素長傳，哈伐斯於左路接應再傳中，施耶殊門前以左腳射入，先開紀錄。33分鐘，迪亞接應妙傳起腳，出迎的伊度亞文迪用腳擋出。2分鐘後，施耶殊傳中，馬高斯阿朗素第一時間起腳，阿辛祖飛身撲出。

可惜，表現活躍的施耶殊疑似右手甩骹，提早退下火線，由佩利錫入替。維拉利爾在完半場前谷一段，艾拔圖於補時3分鐘接應傳中，於小禁區角勁射中楣，未能追平，落後0:1返回更衣室。

易邊後，黃潛加強壓力，終於在73分鐘由迪亞後腳妙傳，謝拉特摩蘭奴射成1:1，進入加時。兩軍再戰30分鐘仍然維持和局，以互射12碼分高下。車路士只有哈伐斯射失，維拉利爾有文迪、艾比奧爾宴客，車仔以6:5捧盃。