【Now Sports】卻奧斯幽默又寸寸哋就應該冇皇家馬德里球迷唔知，不過佢嘅回應對於網絡世界依然係一個寶藏。上星期，佢先喺隊友華斯基斯Instagram送波衫活動上面，留言話佢唔想要，已經惹嚟一系列嘅報道。日前，卻奧斯又回應車路士球員曼治，對於話自己唔會失眠嘅言論。
撰文：步大力熊
「我見到佢哋（皇家馬德里）球員話唔會為一個人而瞓唔著，但佢哋要為我哋一隊而冇得瞓。」曼治喺 歐聯4強賽後訪問。卻奧斯第二日醒咗，就喺Twitter 回覆話：「我仍然瞓得唔錯。另外，噚晚做得好好，恭喜你。祝你第一次歐聯決賽好運。」
首先，唔知點解曼治覺得皇馬球員要瞓唔著，亦可能因為佢覺得，卻奧斯太寸咀所以先咁講。
不過，失眠其實係好多人嘅問題。世界睡眠學會就指出，全球大概有45%嘅人有機會有唔同程度嘅睡眠問題，而大部份睡眠問題都係可以避免，甚至醫番好，但只有少於三份之一嘅人會尋求專業幫助。今年嘅世界睡眠日主題其實係「Regular Sleep, Healthy Furture」，其中一個研究就係發現有規律嘅睡眠會加強表現，意思係有規律嘅8小時睡眠，比每日不同時間瞓嘅8小時，更可以提高表現；而好嘅睡眠更可以提升心理質素，所以瞓覺對職業運動員非常重要。
其實皇迷都知卻奧斯瞓覺大過天，佢都曾經因為西甲賽事太夜開始而出post 話，「平時呢個時間我已經瞓咗。」瞓覺對卻奧斯咁重要，所以就算佢話無嘢會令自己瞓唔著，其實都唔係好出奇。大家唔好怪佢啦。
兩隊都仲有盃爭緊，冇得瞓要深夜睇波嘅應該係香港球迷先啱。
撰文：步大力熊
要做一個理性球迷？不了，成為球迷本身就是一件不理性而且瘋狂的事。
email：ballthirteen@hotmail.com
歡迎瀏覽球十三fb專頁若得到波友一個like就是我們團隊的一大鼓舞：
www.facebook.com/ballthirteen