【Now Sports】世界羽聯巡迴賽重啟，首項賽事──泰國羽毛球公開賽將於明日展開，港隊混雙組合張德正/吳詠瑢於首日32強賽事打頭陣，出戰新西蘭組合利頓戴維斯/朴安娜；緊接的女單賽事，張雁宜會對賽事8號種子、加拿大球手李文珊。（Now TV 631台明早10:00現場直播）
是次泰國羽毛球公開賽，港隊派出伍家朗及李卓耀將出戰男單、張雁宜參與女單，以及鄧俊文/謝影雪、張德正/吳詠瑢出戰混雙項目，希望透過實戰為3月重啟的東京奧運計分賽做好準備。香港羽毛球隊總教練何一鳴賽前透露，球員因為今次比賽，訓練更加投入。
「停咗成10個月都冇比賽，雖然我哋香港隊有得隔離訓練，但係由於冇比賽，訓練嘅目的唔明確，練起上嚟唔係咁投入，呢兩個月決定咗（參賽）之後，訓練有咗目標就比較投入，好明顯啲質量都好好，對於運動員嚟講有比賽係好重要，佢哋亦明白千辛萬苦先至可以參加比賽，所以佢哋訓練同比賽都會盡力。」
被問到今次比賽對球員有何期望，何sir表示，「隔咗咁耐冇比賽，比賽嘅感覺都要搵返，訓練練得好唔等於比賽都可以好好發揮，我哋希望球員今次至少可以打兩個比賽，希望啲球員喺冇乜壓力中發揮自己水平。」
至於3月重啟的東京奧運計分賽的部署和安排，何sir坦言現在仍充滿未知數，「3月世界羽聯就開始計返去年奧運嘅積分，我哋而家唔知個變化會係點，因為今次嘅比賽都千辛萬苦，有啲球隊都去唔到，3月繼續嘅積分會係點，大家都唔知道。但有一樣嘢我成日同球員講，我哋做好今天嘅事去迎接明天嘅來臨，咁你就唔需要太多擔心，太多失望嘅想法。唔需要諗太多，我哋行好今天嘅每一步去迎接明天。」
泰國羽毛球公開賽於12日至17日及19至24日連續舉行兩站公開賽，繼而在27至31日上演世界羽聯巡迴賽總決賽。
泰國羽毛球公開賽（第1站）
Now TV 直播賽程
12/01 10:00 32強 (631及635台)
13/01 10:00 32強 (631及635台)
14/01 10:00 16強 (631及635台)
15/01 12:00 8強 (631及635台)
16/01 12:00 4強 (631台)
17/01 13:00 決賽 (631台)
Now E 同直播