【Now Sports】前香港網球一姐張玲今年9月宣佈掛拍，放下最愛的網球和運動員身份那一刻，確實萬般不捨；哭過後，她拾起運動員的態度，積極重新出發。
採訪：肉面飛龍
【決定退役喊足兩星期】
「自己都喊咗兩個幾星期，因為真係好唔捨得，始終打咗咁多年，好唔捨得擺低運動員嘅生活。」張玲重提當日決定退役時心情時說道。去年手肘經歷9小時大手術，雖然可以回復之前水準，但要1年有30多個星期出外比賽，對於張玲來說的確相當艱難，加上疫情期間以這樣淡淡然方式宣佈退役，難免有遺憾。
【遺憾未能在香港網球公開賽掛拍】
「原本嘅計劃係，自己第一場國際賽喺香港打，我都希望最後一場喺返自己嘅地方，但係因為疫情，今年就冇咗香港網球公開賽，係有少少遺憾。」回想16年網球生涯，張玲表示最開心的事，一定是代表香港攞獎，透過網球令到世界聽到香港的聲音，令她覺得好自豪。這個旅程不開心的地方，就是經常出外比賽，很少與家人相處。
「有陣時出去比賽都好掛住屋企，特別係農曆新年，過年過節時，自己就覺得好孤獨。」不過掛拍兩個多月，現在多了很多Family time，張玲亦開始新身份——學生。
【重返校園最大挑戰要坐定定上堂】
現時張玲正修讀康體及休閒事務管理大專課程，她表示一開始都有困難，因為目前只能透過Zoom上課，未好好認識新同學就要一起做Group Project，「一開始都好困難，大家都唔知邊個係邊個，但係我覺得因為運動員呢個身份，同學都很好奇，所以就好快同大家變得好Friend。」
不過張玲表示做回學生最大挑戰是要坐定定上堂，她笑著說，「自己都好唔慣坐定定喺度幾個鐘，之前可能係每日練跑6至7個鐘，而家要坐定6、7個鐘，呢個係最大嘅挑戰。」
【不斷增值自己回饋體壇】
其實張玲一直十分好學，之前一直都透過EF English Centers與港協暨奧委會的綜合英語課程進修英文，「我都希望可以留喺體育呢個行業，因為咁多年以嚟得到好多人幫助，咁我都希望可以回饋香港體育。首先讀書呢個Step就係希望充實自己去面對之後嘅挑戰，同埋學英文都係好重要嘅環節，咁所以通過EF提升我嘅英文水準，因為之後嘅工作或交流上面，英文係好重要。」
現年31歲的張玲之前已經考獲教練牌，不過除了教波之外，她亦有興趣從事管理和舉辦活動，希望嘗試所有關於體育方面的工作，以後朝著這方向發展。
圖片來源：香港網球總會／張玲Facebook