【Now Sports】曼聯今年開季諸事不順，聯賽錄得2勝2負尷尬成績。領隊蘇斯克查趁國際賽期微調球隊，後防上基本無太大變動，迪基亞、雲比沙卡、連迪洛夫、哈利麥佳亞及梳爾繼續獲蘇B投信任一票，球員整體表現逐漸向好。中場位置方面由費特及麥湯文尼頂替普巴及馬迪，如果單計個人質素前者較後者輸蝕，但如果根據場上表現及化學作用，前者比後者更加優勝，分野就係場上覆蓋範圍！費特及麥湯文尼有足夠體力助攻助守，增加中後場防線緊密程度，為後衛提供更有效支援及保護，呢個改變或成曼聯今季轉捩點。
撰文：梁冠聰｜Now足球評述員
紅魔鬼前線從來不乏進攻機會，般奴費蘭迪斯毫無懸念係球隊進攻靈魂人物，過去球隊一直以快打慢，利用華舒福、馬斯亞及美臣格連活速度撕破敵軍防線。不過，正正因為咁曼聯難以控制節奏，不時只顧製造快速反擊而忽略控球在腳之重要。上仗聯賽蘇B重新起用馬達擔任右翼鋒位置，當面對主守球隊時，前線無太多空間反擊及突破，馬達絕對能夠發揮功效，聯同般奴費蘭迪斯或雲迪比產生巨大化學作用，喺前中場鋪橋搭路及製造攻勢。
巴黎聖日耳門上季復賽後計埋歐聯決賽踢到最尾，球員欠缺時間恢復，球隊亦沒太多時間準備就要迎接新一季賽事。巴黎今夏轉會窗有後衛泰亞高施華轉投車路士，後防上依靠馬昆奴斯及甘賓比，年輕中堅艾度謝路為替補。此外，球隊從羅馬借入科蘭斯增強閘位調動彈性，聯同貝拿特左右二閘雙閘齊飛，成為其中一個進攻殺著。由於兩閘頻頻上前助攻，3中場基耶、靴里拉及華拉迪需兼顧兩閘助攻時所遺留嘅防守空間。
進攻上尼馬擁有極大自由度，經常利用個人突破能力喺前場製造人多打人少機會，而安巴比喺前線靜待後上入楔機會，以高速突破擺脫敵方後衛。然而，當領隊杜曹需要安排全攻型時，迪馬利亞或墮後至左右進攻中場，協助中場策動攻勢。前線卡雲尼及卓普慕廷離隊後，伊卡迪成為停球點進攻核心，但若然杜曹希望改踢穩守突擊戰術，或把安巴比移至最前出任正中鋒，左右兩翼交由尼馬及迪馬利亞負責。
高手過招臨場表現最為關鍵，紅魔鬼後防速度較慢，面對巴黎快速突襲或將備受巨大壓力；巴黎今仗能否控制中場，有效地箝制般奴費蘭迪斯成為比賽勝負關鍵。今場比賽另一焦點係卡雲尼會否上陣，若然上陣的話將係佢代表曼聯上演地標戰兼立即倒戈挑戰舊東家！
巴黎聖日耳門VS曼聯
Now TV 643台21/10 03:00直播
Now E 同步直播