【Now Sports】漫長球季差唔多見到終點,歐洲各大聯賽圓滿結束後,歐聯及歐霸盃呢刻同樣進入4強階段。歐霸盃4強賽事包括曼聯對西維爾及國際米蘭鬥蕯克達,每支球隊各有千秋,各有強弱之處,普遍而言4隊都係攻強於守,一場過嘅淘汰賽事,即管睇下邊隊發揮較穩定,較少犯錯情況下晉身決賽。
撰文:梁冠聰|Now足球評述員
曼聯上場踢到加時階段先至淘汰哥本哈根,整體球員盡顯疲態,當中隊長哈利麥佳亞今季為曼聯及英格蘭出戰60場比賽、共5412分鐘,屬全歐洲上陣時間最多球員。自從季中般奴費蘭迪斯加盟後,為曼聯前線創造較多入球機會,更重要係激活普巴,連同馬迪組成較平衡及全面中場線。前線華舒福、馬斯亞及美臣格連活具備速度及殺傷力,左右兩翼為突破點極為關鍵。不過,講到曼聯最擔心嘅地方就係防線不穩,哈利麥佳亞算係可依靠一員,但連迪洛夫及拜耶始終未能夠令人放心,加上面對西維爾雙閘齊飛嘅踢法,雲比沙卡及班頓威廉斯絕對需要小心。
西維爾復賽後狀態大勇,8強賽事1:0力克狼隊後錄得8勝5和不敗戰績。球隊展示一如以往嘅穩定及韌力,教練盧柏迪利慣用4-3-3陣式,防務工作上中堅卡路士及防守中場費蘭度擔任重要角色,費蘭度喺中場主要作為平衡球員,令班尼加及祖安佐敦或華斯基斯擁有足夠自由度參與進攻及防守,而班尼加係球隊大腦,負責串連及組織攻勢。進攻方面,除咗依靠奧甘保斯及蘇素前場突破之外,左右二閘域基朗及捷西斯拿華斯擁有極強助攻能力,經常聯同左右兩翼喺邊路製造人多打人少機會,成為西維爾最大贏波本錢。
至於另一條戰線由國際米蘭挑戰薩克達,由於國際米蘭前中後3線實力較平均,今場稍為秤先。國米慣用3人防線,高甸及迪維積同樣擁有不俗個人及統領能力,中場上較倚賴波索域及加利亞甸尼兼顧攻守,前鋒山齊士受傷上陣成疑,連續9場歐霸盃建功嘅盧卡古繼續肩負入球重責。薩克達方面,前線泰遜、摩拉斯及馬路斯絕對有力為國米防線帶嚟壓力及製造麻煩,中場阿倫柏迪傑及馬高斯安東尼斯係球隊核心,但2人攔截力稍為遜色,今仗將面對一定考驗。
無論最後誰勝誰負,因為疫情關係,各隊球員奮戰到8月同樣展示一定疲累。因此,球員集中程度和比賽中後段表現,絕對會成為比賽勝負關鍵。主帥臨場調兵遣將及戰術運用,同樣是左右大局重要因素。
【西維爾VS曼聯】17/08 03:00開賽
【國際米蘭VS薩克達】18/08 03:00開賽
Now TV 643台直播
Now E 同步直播