【Now Sports】今年嘅7月1號， 皇家馬德里球會正式迎接佢哋第一隊女子足球隊，佢哋下季將會正式以皇家馬德里嘅名義參加西班牙女子甲組聯賽。好多球迷都冇留意，皇馬之前係一直都冇女子隊，但冇人知原因。
撰文：步大力熊
皇馬多年來都俾自己球迷批評冇女子隊，特別當2019年世界盃，巴塞隆拿女子隊球員參加人數係全個比賽之冠，皇馬又一次要回應點解冇女子隊，當時只係講呢個係暫時嘅問題，而巴塞同馬德里體育會先後喺1988年同2001年已經成立女子隊。過去9年內，都係由呢兩隊同畢爾巴稱霸女子西甲（巴塞5次冠軍，4次亞軍；馬體會3次冠軍，2次亞軍；畢爾巴1次冠軍，3次亞軍）。
除咗皇馬球迷有微言，上年2019巴塞女子隊打入歐聯決賽（雖然輸咗俾里昂），賽前訪問巴塞會長就提出皇馬應該要有一隊女子足球， 等女子都可以有國家打吡。當然呢啲 都係供求問題，而近年西班牙女子足球係開始變得受歡迎，2019年3月，巴塞喺馬體會主場以2:0擊敗主人家，當時入坐率係60,739人（萬達大都會球場有68,456個座位），達88.8%。
通常一個球會冇女子隊多數係因為冇經費，但錢就唔係皇馬嘅問題，亦係令球迷不滿嘅原因。所以2019年底，皇馬本土會員socios終於決定要有女子足球隊，以90.6% 贊成票之下以500,000歐元買入一支馬德里剛剛升上西甲嘅本土球隊CD Tacon。（Tacon 西班牙文係腳踭嘅意思）。會長佩雷斯果然係生意人，買一隊當然係比建立一隊快，而且呢一隊球隊好新，只有6至7年歷史。2020年7月1號當日， 佢哋facebook 名都已經由CD Tacon 轉成Real Madrid C.F，同男子隊一齊喺皇家馬德里體育基地做訓練。皇馬會唔會好似男子隊咁招兵買馬，一年一星第一年就爭取西甲冠軍？大家要拭目以待！
撰文：步大力熊
要做一個理性球迷？不了，成為球迷本身就是一件不理性而且瘋狂的事。
本欄逢周二及周四上載
周二 歪花
周四 步大力熊/泰萊