【Now Sports】港人在嚴峻疫情下，失落之情難免，惟在正自我隔離的「欄后」呂麗瑤眼中，停一停，思考一下平日忽略身邊的事，凡事感恩，那管只是喝一口美味咖啡、細看窗外景致，都可能是度過當前困境的良方。
「過去3個禮拜，我去咗澳洲訓練同埋比賽，由於當地確診個案不斷上升，原本教練安排我哋到當地體院訓練，但因疫情，佢哋體院唔畀外人進入，我哋唯有聯絡昆士蘭大學。佢哋好好咁畀我哋用設施，所以過去3個禮拜訓練冇受到疫情影響。
依家返到嚟喺酒店自我隔離，我唔需要戴手帶，純粹自我隔離，都有出去買日用品，keep住戴口罩同埋出去次數都唔多。訓練方面仲搵緊方法，因為本來諗住去康文署場地練習，但特首啱啱又頒佈再度關閉康文署場地，所以諗緊去邊度訓練，可能係去比較少人嘅地方跑斜路，或者跑行人隧道。
訓練同平時最大分別，係所有嘢都變得唔穩定，尤其係出去比賽後14日冇得入體院，其實都苦惱。每日疫情都變化，好多本來嘅計劃，例如去某個運動場練習，突然間又關門，呢個係同之前最大分別。之前喺體院一切都穩定，設備齊全，你整親會有物理治療師即刻幫手、練習可以敷冰，好多配套；依家一下子冇晒，個人有啲空虛。但係，都係捱14日啫。
之前喺訪問講過今年賽季有兩個目標，一個係去奧運，一個係破香港紀錄，依家第一個目標似乎有啲困難，因為疫情令好多賽事取消，搶分真係好困難，所以暫時放低冇再諗，唔想糾結喺自己控制唔度嘅事。下個目標係盡快喺比賽跑到PP，破香港紀錄。本來報咗香港系列賽一，比賽係4月4號，但啱啱收到消息取消，仲搵緊有冇賽事如期進行。
今次疫症最大體會，係見到香港人好自律、好有愛心，亦好有衛生意識，呢三樣嘢喺疫情度好緊要。由疫症爆發開始，多得香港人自律，每一日好辛苦咁撲口罩，為嘅係出街戴口罩保護自己、保護其他人。我亦見到社會上好多機構，又譬如藝人會諗方法將買到既口罩分畀有需要既人，都展示出香港人既愛心。喺呢啲時刻，分享所擁有既物資，並唔係每個人都做到，但香港人做到，所以我好感動、好開心，proud to be一個香港人。網上有好多人分享清潔方法，好似出街後要抹啲乜、要經常消毒手機。沙士時，智能手機冇咁流行，依家每人都不停觸摸手機，個電話好多細菌，好彩有好多人分享清潔方法，提醒大家點防疫。
香港人真係好能幹，好叻同埋關心其他人。
我記得喺澳洲既時候，有兩個澳洲人同我做簡短訪問，佢哋問：「今日有咩嘢令你覺得grateful？」我呆一呆，平時好少諗呢啲問題，嗰朝我起身淨係飲咗杯咖啡，落咗公園度行，我就答：「今日飲咗杯好飲咖啡。」佢哋畀我睇其他人答咗乜，有人答隻狗上前攬住自己，有人答今朝同屋企人食早餐，有人答今日有太陽天氣好好。
其實呢啲答案每日都出現，只因我哋太忙，忽略咗一啲其實會令我哋開心、溫暖嘅事。喺咁困難嘅時候，尤其係香港人平時步伐咁急促，冇時間畀我哋留意身邊環境、身邊人，諗吓有乜事令自己開心、有好多細微嘅事，其實好值得感恩。
希望大家覺得好depress嘅時候，靜靜諗吓，或者坐喺窗邊望下街上面既人、街上面既車，睇吓呢個你自己住緊嘅，其實係一個好靚嘅地方。好多細微嘅事物，只要去欣賞，都會令我哋開心，令我哋喺疫症時冇咁難過。」
呂麗瑤（跨欄）
【編按：sports.now.com一連數天請來幾位本地體壇精英親述最新訓練狀況之餘，與港人互勉，一同集氣共度時艱。】
明日人物預告：
周健宏（籃球）