【睇通英超】「封關」後放假前……

【Now Sports-體育】轉會窗關閉，封咗關，英超列強最終都以曼聯動作較多，買入般奴費蘭迪斯之後，臨尾再借埋超霸鷹前鋒恩哈路，但係咪短期內展示到威力？好快知！

撰文：球十三

據講恩哈路要幾日後至到英國，而般奴費蘭迪斯（Bruno Fernandes）就會喺今日鬥狼隊匆匆被推上戰場。老實，近幾個月睇得魔狼戰太多，家陣有新元素係多番新鮮感。呢位俾好多人，包括鄉里基斯坦奴朗拿度睇好嘅仁兄操唔得幾課，正常要時間融入隊波，但印象中，曼聯唔少攻擊球員地標戰都有好開始，遠啲嘅有家陣領隊蘇斯克查，近啲嘅有馬斯亞，最近仲有今季加盟閃電建功嘅丹尼爾占士，即管睇般奴會唔會即刻開騷。

今輪比賽後，各路英超大軍將享有難得嘅「冬假」，利物浦已經帶到離行離列，領隊高普有理冇理講明就算下星期有場對梳士貝利嘅英足盃重賽，都會畀班主力休假。又係嘅，紅軍由開季至今戰事太頻密啦，連世冠盃都捧埋，如果因為踢殘傷幾件，季尾有閃失仲得了？

不過利記今日對手修咸頓近況都好勇，唔經唔覺升到上第9，假如爆大冷破利記不敗身，即時追到同曼聯同分。睇番聖徒呢個幾月贏過車路士、熱刺、李斯特城，好似狼隊上身有啲遇強愈強feel，賽前焦點人物丹尼京斯今季大勇大熟，倒戈真係唔講得笑。

今輪賽序

李斯特城VS車路士

Now TV 621台01/02 20:30直播

利物浦VS修咸頓

Now TV 621台01/02 23:00直播

水晶宮VS錫菲聯

Now TV 622台01/02 23:00直播

屈福特VS愛華頓

Now TV 623台01/02 23:00直播

般尼茅夫VS阿士東維拉