【Now Sports-體育】噚日祖雲達斯教練沙利喺一個基斯坦奴朗拿度無踢嘅賽後訪問表示，見到巴塞隆拿嘅美斯比C朗多一個金球獎，令沙利佢覺得好煩惱。點解沙利無啦啦呢日講呢啲……？
撰文：步大力熊
雖然佢今次高調話想幫基斯坦奴朗拿度（Cristiano Ronaldo）拎第6個金球，但其實佢都一直俾各方嘅球迷話佢唔識用C朗，無好好利用佢跳得高嘅優勢，同世界級嘅入楔（tap-in）能力。就喺上個月頭，（2019年12月）媒體仲因為沙利連續兩場都換走C朗而傳出不和，沙利解釋係C朗膝頭哥有傷患，媒體又話C朗表現下滑，仲話佢後悔離開皇馬。而C朗一向用行動證明自己，12月中先嚟一個挑戰人體騰空高度及時間極限嘅頭槌，2020年開年仲入埋佢喺意甲嘅第一個帽子戲法，再次展示佢驚人嘅戰爭力同毅力。
其實C朗喺2012年落後美斯3個金球獎之下，喺2017年終於追平美斯，各人都有5個金球獎。當時都已經令好多人對佢強大身體同心理質素非常讚嘆，即使唔鍾意C朗嘅人都會讚佢嘅毅力，因為唔係一般人都可以喺落後咁多嘅情況下該年追上嚟。
咁沙利可以點幫C朗拎第6個金球獎？可能佢都唔太明個遊戲係點玩。先睇下近兩年得主：2018年，金球獎由喺皇馬連續3次拎咗歐聯冠軍，同埋帶領克羅地亞進入2018世界盃決賽嘅摩迪拎咗，當時雖然C朗都係有連續拎咗3次歐聯同埋個人數據較好，但當年就話其實團隊成績比較重要，所以應該由摩廸奪得。2019年，C朗帶領葡萄牙國家隊贏咗第1屆歐國聯，同時祖雲達斯亦贏得連續第8次意甲冠軍，可惜金球獎只係屈居第3名，輸俾只係贏咗西甲同埋較好個人數據嘅美斯，以及贏咗歐聯同埋帶領荷蘭進入2019歐國聯決賽嘅雲迪克。
外界都唔太明白金球獎標準，不過應該都無咩標準，因為得主係由投票選出嘅，所以每年有份投嘅球員/媒體有咩心水就係當年嘅標準。雖然暫時都睇唔到沙利點可以幫到C朗，或者簡單啲，沙利只係想用激將法令C朗發力去贏意甲同歐聯，不過筆者認為就算係咁，C朗最後可能都會輸俾贏歐國盃或者南美盃嘅球員。所以想拎第6個金球獎，唔可以只靠沙利同祖記，C朗仲要再帶領葡萄牙贏多次歐國盃。就咁睇落去都覺得幾難……
撰文：步大力熊
要做一個理性球迷？不了，成為球迷本身就是一件不理性而且瘋狂的事。
本欄逢周二及周四上載
周二 歪花
周四 步大力熊/泰萊
email：ballthirteen@hotmail.com
歡迎瀏覽球十三fb專頁若得到波友一個like就是我們團隊的一大鼓舞：
www.facebook.com/ballthirteen