艾朗藍斯先食詐糊再建功。
(©AFP)
【now.com體育】周一英超獨腳戲，阿仙奴主場以2:0輕取紐卡素，但入球功臣艾朗藍斯傷出。
阿仙奴把射手奧巴美揚放在後備席，以翼鋒伊禾比擔正，跟奧斯爾、拿卡錫迪（Alexandre Lacazette）合作進攻。紐卡素由朗當任單箭頭，配合艾約斯佩雷斯、米基爾阿米朗。
13分鐘，左閘哥利辛尼斯接應角球二傳，中場艾朗藍斯在遠柱破網，但因為中堅柏柏斯達夫普路斯犯規在先，球證判詐糊。不過，藍斯終究在30分鐘建功，禁區內左腳射入。完半場前，拿卡錫迪接應奧斯爾傳送起腳，門將杜巴夫卡已投降，但翼鋒馬特列治以頭槌護空門，阿仙奴半場僅領先1:0。
下半場，藍斯因傷提早退下火線。83分鐘，後備入替的奧巴美揚頭槌傳予好拍檔拿卡錫迪，後者乘杜巴夫卡出迎笠入，奠定勝局。雖然兵工廠完場前有拿卡錫迪食詐糊，但仍以2:0錄得3連勝。