【now.com體育】點講，曼聯領隊摩連奴能夠續命，據講同佢關係最唔好嗰兩個大牌球星保羅普巴、阿歷斯山齊士都有功勞，假如兩位仁兄踢到上佳水準，紅魔大不同。
撰文：球十三
我哋唔會知，如果今次輸波，摩佬係咪會被炒；今次贏波，摩佬係咪就一定唔會被炒，只知係當球隊踢出份決心，主將賣力踢到水準，以曼聯人腳點會排喺目前呢個位置？更清楚係，摩佬係需要保羅普巴同阿歷斯山齊士。
唔係我話，係數據話，自從摩佬入「魔」，普巴直接間接為球隊貢獻29個英超入球（入13球助攻16次），比其他魔兵都要多。今場波佢雖然冇入波，但真係幾堅，觸球次數（111次）、傳波（78次）、射門（6次）等數據都係全隊第1，全場跑動（11.5公里）、機會創造（2次）就排全隊第2。
好啦，聽講都係同摩佬「唔啱牙」嘅阿歷斯山齊士今番絕殺，救摩佬一命。其實山神喺近3季（計埋之前踢阿仙奴）已經3次喺90+入奠勝球，係同期英超絕殺王。
所以吊詭嘅係，可能同「特別的一個」最過唔去嗰兩個，係重要嘅兩個，如果摩佬想帥位穩，最佳方法仲係令兩位仁兄肯為自己仆心仆命，搞好關係至係上策。搞得掂兩件就冇話唔掂，搞唔好就聽走路。
當然講就容易，要佢兩個連埋摩佬3個咁有個性嘅人走埋一齊和諧共處，談可容易。呢個正正係摩佬身處嘅不安境況。佢唔係有太多時間做嘢，畀佢過到國際賽期，過到初一未必過到十五，因為之後就要接連火併車路士同祖雲達斯，到時至係真正考驗。
題外話，今次係曼聯歷來第7次英超半場落後兩球或以上情況下反勝，其他球隊最多都係得3次。絕處逢生，固然主要係發生喺費Sir年代，只要多啲類似戲劇性劇本，咁至稱得上魔性再現。
撰文：球十三
足球迷叫第十二人，冇偏愛，冷眼旁觀係十三。
email：ballthirteen@hotmail.com
歡迎瀏覽球十三fb專頁，若得到波友一個like，就是我們團隊的一大鼓舞：
www.facebook.com/ballthirteen