【now.com體育】世界盃決賽,將由法國對克羅地亞。兩隊當中,固然有不少球星,但卻有兩個非常相似的球員,也是每一隊都想擁有的球員——文迪蘇傑與基奧特。
撰文:張晨
2人都司職前鋒,同樣不算高產量,於是有不少球迷會說一句「唔入波嘅前鋒,有咩用!換走佢啦!」
偏偏,就是不換走,主帥更對他們寵愛有加。車路士特地購入基奧特;祖雲達斯球迷寧願賣希古因,也想留住文迪蘇傑。因為他們都明白,此類球員未必帶來很多入球,但會帶來很多勝利。他們不需要刷數據,保持入球率這張花紙,他們在陣中角色,就是自己唔入波冇所謂,但會令隊友入波,從而贏波。
說起他倆,大家就會想起一個Term,也是他們最值錢的一環Work Rate。沒錯,他們賣的就是「在對的時間,努力在對的範疇」。進攻時,拉空、做二傳、第一支點、無球跑動,不斷努力令隊友得到更多進攻空間,對手若然唔Mark自己又可以立即射門,或交出助攻。然後有需要時,回防、截傳球路線、Holdball,他們的精神力支撐體力,一落場就預咗打120分鐘,就算到119分鐘,冇晒力,你都唔見佢Hea,連命都畀埋你。如同法國對比利時,基奧特回防回到自己禁區頂,仲有幾下靚偷波;文迪蘇傑在8強戰就有助攻,對英格蘭時更加時入波。
兩位仁兄,另一共通點,就是專入靚波,其中文迪蘇傑把握力更好,歐聯一招「天外飛仙」足以留名,但那邊廂基奧特也有一記「蠍子腳」。球隊就像一間公司,有11個美斯冇用,得11個文迪蘇傑都冇用,最好就是有一個天才型的美斯,再搭上一個爛打爛做,唔介意犧牲自己,仲偶有神來之筆嘅文迪蘇傑、基奧特。
所以,就算你不是天才橫溢,但要記住社會上也不需要11個天才,嘗試爛打爛做,付出120%的Work Rate,即使最後你都不會是財經雜誌上的風雲人物,但至少你會收到一個電話:「喂!有冇興趣嚟我公司發展下呀?」
對,你會成為被需要的人。