【now.com體育】唔經唔覺已經來到4月尾，距離6月世界盃得返1個月多啲，不如同大家分析一下每組晉級形勢，先來A組。A組由俄羅斯、沙特阿拉伯、埃及同烏拉圭4隊爭逐2個出線權。
撰文：盧永義
根據博彩網站數據顯示，該組烏拉圭出線賠率最熱，反映大家都看好烏拉圭能以首名出線，次熱門為主辦國俄羅斯，其後是埃及與沙特阿拉伯。先睇烏拉圭，烏拉圭8年前殺入2010世界盃4強，亦在2011年奪得美洲國家盃冠軍，富有大賽經驗。前鋒線上有巴塞隆拿的蘇亞雷斯、巴黎聖日耳門的卡雲尼，唔少後防聽到個名都已經腳震，攻力絕對有保證。中場有意甲祖雲達斯搵食的賓坦古亞及國際米蘭的馬泰斯雲仙奴可以做串連同掃蕩，加埋馬德里體育會的高甸及占美利斯一老一嫩，防守力毋庸置疑，所以烏拉圭自然被看高一線。
至於主辦國俄羅斯，喺主場球迷吶喊聲之下，絕對唔會hea踢，加上大部份球員都係國內聯賽球會效力，對天氣、城市、球場都非常熟悉，佔盡主場之利。而且以俄佬性格一定同你埋身肉搏、戰到最後一刻，所以出線機會亦頗大。
埃及方面，唔少球員現時在英超球會效力，包括有「埃及美斯」之稱的利物浦前鋒沙拿、阿仙奴的艾利尼、西布朗的希加斯、史篤城的拉馬丹索希等，擁有一定經驗同實力。值得留意是，前鋒沙拿現時以30球，暫居英超射手榜之首，以他今年的狀態表現，相信有力帶領埃及爭取1個晉級資格。至於沙特阿拉伯，雖然世界排名70位，在亞洲排名僅次於伊朗、澳洲、日本同韓國，但相信去到俄羅斯都係主要傾下嚟緊油價走勢，出線機會甚微。
筆者估計，烏拉圭最終能以首名出線，而第2個出線資格將由埃及同俄羅斯爭奪。筆者期望沙拿發揮超水準，帶領埃及出線。
離世界盃仲有55日！
本欄逢星期五上載
作者簡介
盧永義（102），運動及數字愛好者，熱愛足球，為業餘專欄作家，冀以風趣生動方式分享體育之樂。
電郵：102talksport@gmail.com