車路士輕鬆大勝。
(©AFP)
【now.com體育】車路士於周三歐聯C組以無鋒陣出擊，憑翼鋒韋利安梅開二度及博得2個12碼，4:0狂勝大部份時間得10人應戰的卡拉巴克，奠定16強席位。
車路士今戰收起了射手艾華路莫拉達，以夏薩特、柏度洛迪古斯、韋利安（Willian）3名矮小翼鋒攻堅。卡拉巴克甫開賽就大踢緊逼戰術，而且主場球迷每次在對方球員觸球都喝倒采；13分鐘，中場米高勁射中柱彈出。
大難不死的車仔在21分鐘先開紀錄。當時韋利安殺入禁區，被後衛沙迪高夫拉跌，球證直指12碼之餘，更把這名隊長逐離場；夏薩特主理射成1:0。37分鐘，柏度傳予韋利安，後者跟夏薩特one-two後射入，車路士靠前線3子合作，半場領先2:0。
52分鐘，中場法比加斯交出靚波，柏度單刀埋門被出迎的門將薩希救出，韋利安欲補中也無功而還。其後，韋利安再博得12碼，今次由法比加斯操刀，雖然他首次射入後，因為有球員衝入禁區而要重射，但第2次射門仍然入網。
莫拉達在65分鐘入替後表現活躍，但多次埋門都未能命中目標，不過最終車仔仍由韋利安以世界波埋齋，大炒4:0。賽後，車路士5戰得10分，肯定殺入16強。