【now.com體育】到底意大利可以絕處逢生,抑或經歷60年嚟首次緣盡世界盃嘅痛?「保方保方,保住後方!」呢句球迷講咗十幾廿年嘅話,又會唔會從此成為國際舞台嘅絕唱?太多問題,太多情緒,意大利躉,今夜點瞓得著?
撰文:球十三
咪話新一代,「60後」打後嘅球迷都未見證過傳統強國意大利無份踢世界盃,有個老友話首回合前聽到雲杜拉唔信踢唔到決賽周,個心已涼半截,藍軍意大利時間今夜擺陣再鬥瑞典圖收復0:1失地,賽前又聽見老人家講相同說話,真係擔心多兩錢重。老實,若然意大利出局,佢固然冇得撈,但邊有人關心佢去留,關心係大家熟悉嘅球星。
以保方為首嘅防線,食老本食咗好多年,若然決賽周不入,保方固然退落嚟,怕且陣中個別老將,好似另外兩個2006年世界盃冠軍成員巴沙利、迪羅斯怕且都「嗰頭近」。當然大家最唔捨得會係鋼門保方,一代門神緣盡決賽周,對球迷都係損失。
咪住!仲有90分鐘,邊個敢寫死隊波。不過眼見北愛爾蘭同希臘兩場次回合都悶和0:0,未能收復失地,今晚意軍面對死守,會唔會又整場0:0?
聖西路係藍軍福地,據講隊波喺呢個米蘭主場踢嘅國際賽未輸過,不過今夜唔輸都唔夠,一定要贏,而且仲要咪失波,失1球就至少攻入3球,以意軍目前鋒力,3球太難。
所以講到尾,波固然要入;後防實在不容有失,晉級先決條件,仲係要靠保方保住後方先。
撰文:球十三
足球迷叫第十二人,冇偏愛,冷眼旁觀係十三。
email:ballthirteen@hotmail.com
歡迎瀏覽球十三fb專頁,若得到波友一個like,就是我們團隊的一大鼓舞:
www.facebook.com/ballthirteen