【now.com體育】意大利對上一次打唔入世界盃決賽周，係1958年，BBC講得啱，當年見證呢一幕嘅人，家陣已達花甲之年。
撰文：球十三
「我哋冇諗過踢唔入決賽周。」意大利教練雲杜拉喺今日世界盃附加賽首回合作客鬥瑞典前，似乎胸有成竹，反而十三知道身邊唔少意大利躉對佢信心唔多夠，你話唔擔心勢係假。又係嘅，荷蘭、智利、美國……今屆外圍賽唔少傳統名牌或者決賽周常客都打柴，就算意大利牌面上秤高過瑞典，但邊個敢寫包單？
十三記得意大利對上一次食驚風散入決賽周，啱啱係20年前，仲記得主場死攻爛攻被英格蘭悶和，分組賽屈居次名要踢附加賽，鬥俄羅斯就出現保方臨危受命把關……眨眼20年囉，保方準備最後一擊踢埋世界盃退役，呢個心願，單靠佢一個唔能夠達成，要靠隊友幫拖至成事。
睇今次外圍賽，意大利中前場真係欠領軍人物，你話踢整體咩，又唔見好似干地舊年領軍踢歐國盃咁有效率，外圍賽分組賽被狂牛K.O.，完全係冇得踢嗰隻。當獲重召嘅施蒙尼沙薩操練受傷，意國傳媒已大做文章，死未？唔係踩佢，換轉係意大利高峰期，沙薩呢類人物，後備都未必有份踢。
瑞典冇2004年歐國盃破意軍大門嘅伊巴謙莫域，鋒力係弱咗，意大利唔怕再有人出「怪腳」，但呢支北歐兵團始終爛打，今年贏過葡萄牙同法國，一下唔覺意主場入你一粒贏波，要藍軍次回合返主場搶攻，就真係危機四伏。
1958年冇意大利嘅世界盃正正喺瑞典上演，成為意大利躉嘅遺憾、集體噩夢，即管睇隊波爭唔爭氣，咪要球迷再發瑞典噩夢至好。
撰文：球十三
足球迷叫第十二人，冇偏愛，冷眼旁觀係十三。
email：ballthirteen@hotmail.com
歡迎瀏覽球十三fb專頁，若得到波友一個like，就是我們團隊的一大鼓舞：
www.facebook.com/ballthirteen