【now.com體育】巴黎聖日耳門啱啱砌低里昂,延續連贏兼破對手不敗身,明明可喜可賀,但睇見尼馬同卡雲尼兩大射手爭踢12碼,潛藏危機慢慢浮面。 撰文:球十三
比賽期間,基利安麥巴比博得12碼,卡雲尼好快就企定定準備主踢,不過尼馬就喺身邊唸唸有詞,似乎係游說對方孔融讓梨,但卡雲尼闊佬懶理,擺擺手,尼馬無癮行開,仲隱約見佢搖搖頭,似乎唔忿氣。
結果唔知係咪有壓力,卡雲尼主射被安東尼盧比斯擋出。撇開呢球波,其實之前有另一個鏡頭係卡雲尼想主射自由球,但丹尼爾死都唔肯交個波畀佢,而畀同鄉兼老死尼馬,用意唔使多講。
雖然話PSG最終都贏,但兩件事,話冇令勝仗蒙上陰影就假嘅。
唔好話十三小事化大,PSG球迷應該心中有數,其實喺尼馬入「門」後,一早有記者問教練艾美利日後邊個係12碼劊子手,只係艾美利當時避談;經過呢場波,少不免又有人重提呢個好問題,即管聽佢今次點答:「12碼由少數球員負責,一個係卡雲尼,另一個係尼馬。當中係君子協定。」講咗,等於冇講。「之後,我哋會內部傾,因為佢兩個都有能力主踢,而我想佢哋輪流負責。如果冇共識,我至會決定,唔想成為一大問題。」咁就清楚啲,意思係佢想先拋番個波畀兩大射手,真係搞唔掂至出手。講完。
尼馬離開巴塞隆拿,一心去PSG做大哥大,明,但唔代表你2.22億歐元身價就大晒,新亨利後生仔當然唔敢爭,不過卡雲尼唔同,排資論輩,又同過咁多人合作點會「舍」你。尼馬或者有巴西幫擁護,卡雲尼何嘗冇既有隊友撐腰?
講到輪流射喎,難免貨比貨盞大家有壓力,而去到大戰關鍵時刻,冇份射嗰位仁兄又會唔會牙癢癢?
唔想內部撕裂?呢家嘢香港人最明白,除非是旦一方肯釋出善意啦,否則做阿頭嘅艾美利避無可避,要果斷行事,呢個就係執教富貴兵團之苦。食得鹹魚,抵得渴。
最後,想分享一段當日美斯讓畀尼馬射12碼嘅片段,十三唔係話卡雲尼一定要讓,只係想順勢讚當世球王嗰份簡直昇華到與世無爭嘅情操。
相關片段:
卡雲尼vs尼馬
https://youtu.be/oqoSjusBCB8
美斯
https://www.youtube.com/watch?v=VfUH1fnvYcQ
撰文:球十三
足球迷叫第十二人,冇偏愛,冷眼旁觀係十三。
email:ballthirteen@hotmail.com
歡迎瀏覽球十三fb專頁,若得到波友一個like,就是我們團隊的一大鼓舞:
www.facebook.com/ballthirteen