PSG想極速稱霸歐聯，話咁易？
(©AFP)
【now.com體育】被公認為全世界水準最強嘅球會級賽事，即歐聯今日開打，今年各大傳媒就將焦點放喺巴黎聖日耳門身上，球迷屏息以待用大半年時間，睇到底係有錢就萬能，抑或只係泡沫裡的夢？ 撰文：球十三
近日《馬卡報》列出PSG個陣史上最貴，正選總值6.4億歐元，而聯賽都未贏返，PSG陣營人士已經不止一次話以贏歐聯為目標，班主話要2年，而尼馬直頭講真心話，目標係今年就贏。十三好記得當年油王2003年入主車路士，就豪言要贏歐聯，結果藍戰士用兩季時間就贏英超，但搞下搞下，去到2011/12年球季憑迪馬堤奧空降帶嚟神來之筆，至一圓歐聯捧盃夢。
所以，更加財大氣粗嘅PSG，真係可以極速企上歐洲足球之巔？
喺法甲，PSG既然從摩納哥手上撬得走新亨利，講實力彼竭我盈 ，重奪法甲應該唔難，或者到半季就可集中火力爭歐聯；講經驗，尼馬賽前如數家珍咁話自己贏過歐聯、丹尼爾贏過3次，而莫達同迪馬利亞亦捧過盃，所以呢方面唔係問題喎。
講對手，完成衛冕歷史任務嘅皇家馬德里，同巴塞隆拿嘅西甲之爭沒完沒了，內耗之餘歐聯又從不失戰鬥力；英超，前冠軍曼聯同利物浦再次加入戰圈，同任何球隊都有得鬥。咪數漏感覺上氣勢弱咗，但永遠係大賽能手嘅拜仁慕尼黑、對上3季兩入決賽嘅祖雲達斯。
唔好當列強係死。
PSG一下子換入兩個攻擊核心，講隊型、默契應該仲有排執，而齋講今日對手些路迪就未必係想像中咁易應付，人家實力係次一皮，但蘇格蘭班霸逢鬥頂級勁旅都打甩門牙帶血吞，邊敢講PSG贏硬？
撰文：球十三
足球迷叫第十二人，冇偏愛，冷眼旁觀係十三。
email：ballthirteen@hotmail.com
歡迎瀏覽球十三fb專頁，若得到波友一個like，就是我們團隊的一大鼓舞：
www.facebook.com/ballthirteen