輸場咁大，好彩季初仲有大把機會執。
(©AFP)
【now.com體育】以為勢均力敵，點知一面倒，借用領隊雲加賽後所言，阿仙奴周日被利物浦大敗，仲錄得0中框射門係災難性，不過阿Q啲講，季初當頭棒喝，總好過遲啲連亡羊補牢機會都冇。 撰文：球十三
阿仙奴呢一日作客慘吞利物浦4蛋，有睇波嘅應該都同意踢嚟完全唔似同級球隊較量，阿仙奴攻不銳守又不穩，同勢凶夾狼，踢得行雲流水嘅紅軍形成強烈對比，講波佬加利尼維利半場就炮轟眾「兵」表現簡直係對著住嘅波衫唔尊重。
經此大敗，唔知賽後話輸大圍，暗指唔止輸自己嘅雲加實際心裡有咩盤算，不過十三就即時聯想幾乎係6年前同一日，阿仙奴又係聯賽第3輪作客被曼聯大炒2:8，又係經歷兩連敗陷入困窘。當年又係國際賽期前夕，可以話畀機會阿仙奴喘氣，仲急急趁轉會窗關閉前招「兵」救亡，包括引入梅迪薩卡。嗰季，阿仙奴最終得到第3名，事後睇番，嗰場大敗都算係撥亂反正嘅契機。
唔係叫阿仙奴又亂石投林急急發放銀彈，呢場波除咗係踢嚟冇隊型，仲冇士氣，雲加真係要好好把握「唞氣位」調整一下，亦唔好諗住今夏押重注以破球會紀錄買入拿卡錫迪，佢口中所謂好「筍」嘅交易，就夠力逐鹿中原。家陣自知不足知恥近乎勇，好過有頭威冇尾陣。
冇人唔記得去季車路士又係季初輸場大大鑊，喺9月以0:3遭逢全季最大敗仗，當時對手正正係阿仙奴。嗰場大敗後，車路士領隊干地決意調整戰術，結果有目共睹。家陣阿仙奴大敗嚟得比車路士更早，輸得更甘，唔知會唔會從中借鏡。
撰文：球十三
足球迷叫第十二人，冇偏愛，冷眼旁觀係十三。
email：ballthirteen@hotmail.com
歡迎瀏覽球十三fb專頁，若得到波友一個like，就是我們團隊的一大鼓舞：
www.facebook.com/ballthirteen