【A&M Diary】叫餸食飯對於唔少人嚟講，可能係家庭小菜館，亦係大家嘅comfort food。雖然有時食到悶悶地，但其實小菜都可以有好多新意，為你帶嚟新鮮感。位於大角咀嘅喜聚坊，睇落好似平平無奇，但其實大廚大有來頭，以失傳嘅傳統方法，將港式叫餸食飯嘅經典重現。
老火煲薏米冬瓜豬尾骨湯
港式小菜又點少得老火湯呢！至於夏天嘅時令湯水，當然就係瓜啦！呢個老火煲薏米冬瓜豬尾骨湯非常足料，湯底清甜消暑，飲完又唔會死鹹頸渴。餐廳仲會將湯渣另上，輕鬆食埋湯渣，所有精華都吸收晒。
失傳醬脆皮生炒骨
生炒骨肯定成日食，但喜聚坊嘅大廚就用咗失傳嘅五醋五糖方法去煮，而每舊生炒骨都炸得皮脆肉嫩，再配埋三色椒，味道酸酸甜甜，非常開胃。
失傳煎釀太子魚肚
推介！想食記住提早預訂呀！魚肚大大嚿，非常厚身。魚肚內釀入瑤柱同鮮梅頭肉碎，再用鮑汁煎完再煮。除咗充滿口感之外，魚肚膠口充滿骨膠原，至於味道除咗濃郁嘅鮑汁，仲帶有淡淡嘅瑤柱鮮甜味 ，極具層次。
