【A&M Diary】元朗嘅人氣餐廳同美食，第一時間可能諗起大馬路一帶，但如果揸車嘅話，相信都領教過搵車位嘅難題。嚟到遠離大馬路嘅泰東，餐廳提供大量泊車位，絕對係駕駛人士嘅喜訊。另外，餐廳分為室內同室外，設計佈局具泰式風情，加上出品有驚喜，就算做步兵都值得一訪。
泰國鮮蝦甘柚沙律
前菜揀咗泰國鮮蝦甘柚沙律，估唔到份量十足，勁多大蝦，非常鮮甜彈牙，加上微酸嘅甘柚，絕對係開胃嘅選擇。
印尼沙嗲
呢個印尼沙嗲，有齊豬、牛、雞，串燒火候啱啱好，帶有微微焦香，而肉汁得以保持，但講到沙嗲，最正當然係非常惹味嘅沙嗲醬。
冬蔭功蝦湯
食泰菜點會唔叫冬陰功湯呢？蝦同秀珍菇嘅份量相當多，夠晒抵食。冬陰功嘅酸辣調味啱啱好，夠晒醒胃。
