【Viu】《香港隊vs國際邁亞密》表演賽今日喺香港大球場舉行，除特首李家超、財爺陳茂波現身外，好多藝人名人都有去捧場，連影帝梁朝偉都偕太太劉嘉玲嚟睇波。
當國際邁阿密美班主之一碧咸，特登落草地同香港足球總會主席霍啟山等一齊喺飛龍前影合照後，佢就去到草地場邊被集郵，梁朝偉同劉嘉玲都落到嚟同碧咸握手影合照，嘉玲好識做，推老公上前同碧咸來個世紀合照先，實行甘願做偉仔背後的女人，而朝偉同碧咸影相時，二人見面有傾有講，之後嘉玲再加入企中間影合照，成為全日捧場藝人中的一大焦點！
而表演嘉賓之一的G.E.M.鄧紫棋亦成功集郵，她穿著粉紅球衣走向碧咸賽喧，然後要求咸爺簽名於其背部，之後又拿出手機自拍合照，令全場觀眾嘩聲四起，羨慕不已！
而比賽前，姜濤同Anson Lo擔任表演嘉賓之一，姜濤同Anson Lo分別唱出《黑月》同《On》，各自演出完後，姜濤同Anson Lo喺舞蹈員勁舞配合下，再合作獻唱《Rumours 》，炒熱現場氣氛。另一嘉賓歌手Gareth T.就打頭陣獻唱兩首自創歌曲《勁浪漫 超溫馨》、《 緊急聯絡人》，一身黑西裝配黑超，cool到爆與結他同小提琴一齊合作，其中靚仔結他手十分搶鏡。
另外，不少明星藝人都嚟追星，包括影后葉童、馮德倫、任達華、陳健安、陳智燊、周汶錡一家、等都有前來欣賞呢場精彩賽事，好熱鬧呀。
