【A&M Diary】荃灣出名多嘢食，但今日就好想食熱辣辣又爆晒湯汁嘅餃子，真係諗起都滿足呀！嚟到呢間主打手工餃子嘅餃嘢，多達14款唔同餡料嘅餃子，粒粒都漲卜卜，勁足料，而且全人手製作，加上小店形式經營，充滿家的味道。
涼拌雲耳、酸辣鳯爪
套餐仲可以加配自家小食，涼拌雲耳用上微酸嘅黑醋，而且雲耳相當爽口，非常開胃；至於酸辣鳳爪極度惹味，酸味較微加上慢慢滲出嘅辣味，真係令人食上癮啊。
牛肉芫茜餃子拼濃情孜然羊肉餃子
餃嘢嘅餃子，除咗口味款式多，連煮法都可以揀湯、拌、蒸同煎。其中牛肉芫茜餃子同濃情孜然羊肉餃子就揀咗蒸餃。先試嘅牛肉芫茜餃子嘅芫茜味超香濃，而牛肉嘅肉汁隨之爆發出，非常驚喜；孜然同羊肉永遠都係最佳拍擋，但比例係最重要嘅關鍵，而餃嘢嘅濃情孜然羊肉餃子，孜然同羊肉嘅比例份量啱啱好，充滿大漠風情嘅感覺。
芝士牛肉蘑菇餃子拼豬肉西洋菜餃子
至於芝士牛肉蘑菇餃子同豬肉西洋菜餃子就揀咗煎餃，煎餃嘅賣相唔錯，火候控制剛剛好，皮簿餡靚，外脆內軟。特別鍾意芝士牛肉蘑菇水餃呢個驚喜又新穎嘅組合，煎過後嘅芝士熔入牛肉當中，非常creamy；期間限定嘅豬肉西洋菜餃子，西洋菜味新鮮香濃，係店家嘅人氣餃子，絕對係必食推介。
楊梅青檸飲
除咗解渴仲相當醒胃，同樣餐廳自家出品，極具心思。
