【A&M Diary】近年好多餐廳都標榜自己係私房菜，但其實掛上「私房菜」呢個名，真係一啲都唔容易。因為食客對於私房菜嘅要求更高，外觀、用料、味道、鑊氣，缺一不可！今次嚟到銅鑼灣嘅財記辣蟹私房菜，睇吓佢嘅私房菜係唔係真係高質好味啦！
豉椒炒蜆
銅鑼灣財記辣蟹私房菜由老字號嘅前越華會原班人馬接手，餐廳仍然主打辣蟹、海鮮同小菜。其中一道菜可以試齊外觀、用料、味道、鑊氣，當然就係傳統大排檔小菜：豉椒炒蜆！蜆肉脹卜卜，粒粒都開晒，蜆肉新鮮無沙，加埋惹味嘅豉椒汁，夠晒鑊氣，好好味呢！
脆皮炸豆腐
豆腐即叫即炸，炸到金黃色，外觀真係非常吸引！脆皮炸豆腐熱辣辣，炸到外脆內軟，加啲椒鹽吊味，非常香口。
魚香茄子煲
食小菜當然唔少得送飯嘅代表：魚香茄子煲。一拎起煲蓋就聞到鹹香味，呢份鹹香味帶領整個魚香茄子煲，香味濃郁。至於茄子索晒啲汁，味道除咗鹹香之餘，仲有少少香辣味，味道充滿層次。
鮮蟹肉扒時蔬
嘩！加入咗蛋白嘅鮮蟹肉淋上西蘭花之上，份量夠晒多，西蘭花加上鮮蟹肉一齊食，蟹晒新鮮，中和番之前重口味餸菜嘅味道。
